Փաստ ինֆո

Ես դա իրականացրել եմ բոլոր պաշտպանության նախարարների և անձամբ իմ անունից, զգացմունքային պոռթկում է եղել՝ անհարգալից վերաբերմունքի՝ բանակի և ՊՆ բոլոր նախարարների նկատմամբ։ Այս մասին Հանրային հեռուստաընկերության «Հարցազրույց» հաղորդաշարի եթերում ասել է «Հայաստան» խմբակցության ղեկավար, ՀՀ ՊՆ նախկին նախարար Սեյրան Օհանյանը՝ անդրադառնալով ԱԺ-ում օրեր առաջ իր և իշխանական պատգամավոր Հայկ Սարգսյանի միջև տեղի ունեցած միջադեպին։

Հիշեցնենք, որ ԱԺ-ում երկու օր շարունակ միջադեպեր, այդ թվում՝ ծեծկռտուքներ են տեղի ունեցել։ Նախօրեին վիճաբանություն է եղել, երբ իշխանական պատգամավոր Հայկ Սարգսյանը՝ «Շիշ բռնողը», հայտարարել էր, թե բոլոր այն ՊՆ նախարարները, ում օրոք հնարավոր է եղել ազատվել պարտադիր զինվորական ծառայությունից, դավաճաններ են, իսկ այն բանից հետո, երբ «Հայաստան» խմբակցության պատգամավոր, գեներալ-գնդապետ Սեյրան Օհանյանին դիմել է «արա»-ով, ինչին ի պատասխան Սեյրան Օհանյանը շիշ է նետել վերջինիս ուղղությամբ։

«Ի տարբերություն իրենց՝ այսօրվա քաղաքական ուժերի, ես կարող եմ զբաղվել նաև ինքնաքննադատությամբ։ Բոլոր նախարարների ժամանակ էլ եղել են և՛ դրական կողմեր՝ առաջընթաց, զարգացում, բանակն ապացուցել է, որ իրականում կայացած կառույց է, և՛ թերություններ ու բացթողումներ։ Ես մեծ աշխատանք եմ տարել կաշառակերության, կոռուպցիոն ռիսկերի դեմ։ 8.5 տարվա ընթացքում շուրջ 135 անձանց ազատել եմ առնվազն գնդապետի պաշտոնից, որոնց կեսը կապված է եղել կոռուպցիոն ռիսկերի հետ։ Դա նշանակում է, որ ես յուրաքանչյուր 23 օրը մեկ համապատասխան որոշում եմ ընդունել, և դրանց մի մասը եղել է նաև զորակոչի հետ կապված։ Դա նշանակում է, որ իմ պաշտոնավարման ժամանակ էլ եղել են թերություններ, իսկ ես ՊՆ նախարար եմ եղել, դա ուղղակի վերաբերում էր նաև ինձ»,- նշեց Օհանյանը՝ հավելելով, որ պաշտպանել է նաև այսօրվա պաշտպանության նախարարին, քանի որ այսօրվա ՊՆ նախարարն է շարունակում այն գործողությունը՝ բանակը զարգացնելու ուղղությամբ։

Օհանյանն ընդգծեց, որ անհարգալից վերաբերմունք է, երբ դավաճան են անվանում, բացի այդ՝ Հայկ Սարգսյանն իրավունք չուներ իր հետ խոսել «արա»-ով։ Օհանյանի խոսքով՝ շուրջ 23 օր շարունակ ինքը հանգիստ նստել և լսել է բոլոր այն քննադատությունները, շատ դեպքերում՝ վիրավորանքներն իր և բանակի նկատմամբ։

«Այս օրերին այնպես էր ստացվել, որ կարծես թե ես պաշտպանության նախարարն եմ, իրենք՝ ընդդիմությունը։ Իրենք ընդդիմության այդ կերպարից դուրս չեն եկել։ Իրենք պատասխանատու են այսօրվա գործունեության նկատմամբ։ Այդ պոռթկումը համաչափ է, ավելի մոտ լիներ, կարող է հայրական մի հատ ապտակ տայի»,-ընդգծեց Օհանյանը։

Աղբյուր` Փաստինֆո