Փաստ ինֆո

Գործով ձեռք բերված ապացույցները բավարար և հիմնավոր էին Արմեն Բիլյանի կողմից Գագիկ Մկրտչյանին սպանելու հանգամանքը հաստատված համարելու համար։ Այս մասին Վերաքննիչ քրեական դատարանում ասաց մեղադրող դատախազ Պետրոս Պետրոսյանը։ Ինչպես արդեն տեղեկացրել ենք՝ Վերաքննիչ դատարանում սկսվել է «Սասնա ծռեր 1» գործով դատավճռի դեմ բողոքների քննությունը։

Դատախազն ընդգծեց, որ Արմեն Բիլյանին սպանության հոդվածով արդարացնելով, իսկ Սմբատ Բարսեղյանին ցմահ ազատազրկման չդատապարտելով, դատարանը թույլ է տվել դատական սխալ, մասնավորապես, նյութական և դատավարական այնպիսի սխալներ, որոնք ազդել են գործի ելքի վրա։ Ըստ դատախազի՝ դատական ակտում ներկայացված ապացույցների մասով անդրադարձ, որևէ կերպ վերլուծություն չի կատարվել։

Նրա փոխանցմամբ՝ դատական ակտում մի դեպքում նշվել է, թե ապացույցները բավարար չեն Արմեն Բիլյանին սպանության հատկանիշներով առաջադրված մեղադրանքը հաստատված համարելու համար, ավելին, քննությամբ սպառվել են նոր ապացույցներ ձեռք բերելու բոլոր հնարավորությունները, իսկ չփարատված կասկածները մեկնաբանվում են հօգուտ մեղադրյալի։ Բացի այդ՝ դատավճռոմ, թեև դատարանը հաստատված չի համարել Բիլյանի՝ ՊՊԾ տարածքի զինանոցում, հերթապահ մասում գտնվելու հանգամանը, բայց հաստատված է համարել ՀՀ ՔՕ 238-րդ հոդվածով մեղսագրվող արարքը, ուստի, դատախազը գտնում է, որ այդտեղ կա հակասություն։

Մեղադրող դատախազը նաև բարձրացրեց մեկ այլ գործով ամբաստանյալ Էդգար Սողոմոնյանի ցուցմունքների հակասությունները, մասնավորապես հակասել են Սողոմոնյանի նախաքննական ու դատարանում տված ցուցմունքները։ Երեւանի ընդհանուր իրավասության դատարանը հանգել էր այն եզրակացության, որ նախաքննության ընթացքում Սողոմոնյանը ճնշումների ներքո է տվել նախաքննության մարմնին հաճո ցուցմունքներ, սակայն դատարանում հետագա հարցաքննությունների ընթացքում հերքել է նախաքննական ցուցմունքները՝ պնդելով, թե նախաքննության ընթացքում ցուցմունքներ չի տվել։ Դատախազի խոսքով՝ ֆանտաստիկայի ժանրից է այն, որ Սողոմոնյանը կարող էր ցուցմունք չտալ, քննիչն ինքն է այդ ցուցմունքները նշել, իսկ փաստաբանը, որը, ըստ դատախազի, ունի բարձր մասնագիտական որակներ, չէր կարող լռել, տեսնել, թե ինչպես է քննիչը ցուցմունքը «գրում», հետո ասում՝ ստորագրի։ Բացի այդ՝ Սողոմոնյանը հայտնել էր, թե քննիչը միմիկայով, աչքերով ուղղորդել է իրեն ցուցմունք տալիս, ինչը դատախազի պնդմամբ, գիտաֆանտաստիկ ժանրից է։

«Գիտաֆանտաստիկ ժանրից է։ Չգիտեմ մի քննիչ, որը կարող էր 45 րոպե շարունակ աչքերով, միմիկաներով ուղղորդելով ազդեր Էդգար Սողոմոնյանի ցուցմունքի վրա։ Դա աբսուրդ է»,-նշեց Պետրոսյանը՝ ընդգծելով, որ Սողոմոնյանի կողմից դատարանին տրված ցուցմունքն անարժանահավատ է։ Բացի այդ՝ դատախազը նշեց, որ նույնիսկ ամբաստանյալների ցուցմունքներն են միմյանց հակասում։

Դատախազ Պետրոս Պետրոսյանը նշեց, որ ոստիկանության ծառայող Գագիկ Մկրտչյանին Բիլյանի կողմից ապօրինի կյանքից զրկելը հաստատվում են ապացույցներով։

Ինչ վերաբերում է Սմբատ Բարսեղյանին, ապա դատախազը Վերաքննիչ դատարանից պահանջում է պարզել՝ արդյո՞ք հիմնավոր է Բարսեղյանին ցմահ ազատազրկման չդատապարտելու մասին վճիռը։ Պետրոսյանի խոսքով՝ առավել բարձր հանրային վտանգավորություն չի պատկերացնում, դատարանը ճիշտ գնահատման է արժանացրել բարձր հանրային վտանգավորությունը և վճիռ է կայացրել՝ նշելով, որ որպես պատիժ է նշանակվում առավելագույնը՝ 20 տարի ժամկետով ազատազրկումը, մինչդեռ, առավելագույն պատիժը ցմահ ազատազրկումն է։ Պետրոսյանն արձանագրեց, որ խոսում ենք երկու անմեղ ոստիկանի սպանության մասին, որոնք իրականացրել են իրենց ծառայողական պարտականությունները, առկա են չորս ծանրացուցիչ բաղադրիչներ, մինչդեռ, նախադեպեր կան, երբ նույնիսկ մեկ բաղադրիչի պարագայում անձը դատապարտվել է ցմահ ազատազրկման։

Դատախազը միջնորդեց մասնակի բեկանել դատավճիռը՝ Բիլյանին մեղավոր ճանաչել նաև Գագիկ Մկրտչյանի սպանության հատկանիշներով, իսկ Սմբատ Բարսեղյանի նկատմամբ ընտրել որպես պատիժ՝ ցմահ ազատազրկում։ Մեղադրող դատախազ Արամ Արամյանը և տուժող կողմը միացան մեղադրանքի դատախազ Պետրոսյանի դիրքորոշմանը։ Տուժողի իրավահաջորդը նշեց, որ իր երեք երեխաների արցունքներն ամեն օր չի կարողանում մոռանալ, իր ամուսինը մահացել է ամբաստանյալների՝ զվարճանալու պատճառով։ Տուժողի իրավահաջորդները նշեցին, որ դատարանից արդարադատություն են պահանջում, ամբաստանյալներն իրենց դրել են հայրենիքի հերոսի տեղ, բայց զենք են բարձրացնում ՀՀ ոստիկանության ծառայողների վրա։

Աշխատանքային ժամի ավարտով պայմանավորված դատական նիստը հետաձգվեց։

Հիշեցնենք, որ Երևանի ընդհանուր իրավասության դատարանը՝ դատավոր Մեսրոպ Մակյանի նախագահությամբ, հունիսի 24-ին հրապարակել է «Սասնա ծռեր» գործով դատավճիռը, համաձայն որի՝ Արայիկ Խանդոյանի նկատմամբ քրեական հետապնդումը դադարեցվել է՝ մահվան հիմքով, Պավել Մանուկյանը մեղավոր է ճանաչվել՝ դատապարտվելով ազատազրկման՝ 7 տարի 8 ամիս ժամկետով, Վարուժան Ավետիսյանը՝ 7 տարի 4 ամիս, Մխիթար Ավետիսյանը 7, 5, Էդվարդ Գրիգորյանը՝ ՝6,5 տարի, Գագիկ Եղիազարյանը՝ 7 տարի 5 ամիս, Արեգ Կյուրեղյանը՝ 7 տարի 1 ամիս, Սեդրակ Նազարյանը՝ 8 տարի 2 ամիս ժամկետով։Նշենք, որ երկու ոստիկանի՝ Յուրի Տեփանոսյանի և Արթուր Վանոյանի սպանության մեջ մեղադրվող Սմբատ Բարսեղյանը, որի համար դատախազը պահանջել էր ցմահ ազատազրկում, դատապարտվել է ազատազրկման՝ 25 տարի ժամկետով, իսկ Արմեն Բիլյանը, որին մեղսագրվում էր ոստիկանության ծառայող գագիկ Մկրտչյանի սպանությունը, դատապարտվել է ազատազրկման՝ 4 տարի 11 ամիս ժամկետով։ Դատարանը, մասնավորապես, հիմնավորված չի համարել Բիլյանին սպանության համար առաջադրված մեղադրանքը եւ արդարացրել է նրան այդ մասով՝ հռչակելով վերջինիս անմեղությունը նրա մասնակցությունն ապացուցված չլինելու հիմքով։

Բիլյանը մեղավոր է ճանաչվել ՀՀ ՔՕ 235-րդ հոդվածի 3-րդ մասով, 218-րդ հոդվածի 3-րդ մասի 1-ին կետով, 238-րդ հոդվածի 4-րդ մասի 1-ին և 177-րդ հոդվածի 3-րդ մասի 1-ին և 2-րդ կետերով նախատեսված հանցագործությունների կատարման մեջ՝ կազմակերպված խմբի կողմից զենք-զինամթերք պահելու, կրելու, կազմակերպված խմբի կողմից պատանդ վերցնելու, կազմակերպված խմբի կողմից հրազեն շորթելու, կազմակերպված խմբի կողմից առանձնապես խոշոր չափերով գողություն կատարելու համար։

Ավելին՝ Բիլյանի նկատմամբ ընտրված խափանման միջոց կալանավորումը փոխարինվել էր չհեռանալու մասին ստորագրությամբ՝ մինչև դատավճռի օրինական ուժի մեջ մտնելը, վերջինս ազատ էր արձակվել հենց դատական նիստերի դահլիճից։

Հեղինակ՝ Իզաբել Սահակյան

Աղբյուր` Փաստինֆո