Փաստ ինֆո

Վերաքննիչ քրեական դատարանում՝ դատավոր Տիգրան Սահակյանի նախագահությամբ, կազմով դատավորներ՝ Արմեն Բեկթաշյանի և Ռուբիկ Մխիթարյանի, ընթանում է «Սասնա ծռեր»1 գործով դատավճիռների դեմ ներկայացված բողոքների քննությունը։

Նկատենք, որ ի սկզբանե բողոքները պետք է քննվեին ամենաբարձր վարկանիշ ունեցող դատավորների կողմից՝ Ալեքսանդր Ազարյանի նախագահությամբ, դատարանի կազմում են եղել նաև դատավորներ Մխիթար Պապոյանը և Սերգեյ Մարաբյանը, սակայն ամբաստանյալները հենց առաջին դատական նիստին ակնհայտ անհարգալից վերաբերմունք են ցուցաբերել դատարանի նկատմամբ, ընդ որում, դա այն պայմաններում, որ հենց ամբաստանյալների պաշտպանները դատարանի կազմի վերաբերյալ որևէ առարկություն չեն ունեցել, ինքնաբացարկի հիմքեր չեն տեսել։

Այդուհանդերձ, դատարանի կազմը փոխվել է, ինչից հետո բողոքները մակագրվել են դատավորներ Տիգրան Սահակյանին, Արմեն Բեկթաշյանին և Ռուբիկ Մխիթարյանին։

«Փաստինֆո»-ի հաղորդմամբ՝ դատական նիստին ներկայացվել է նաև ամբաստանյալ Էդվարդ Գրիգորյանը, որը դատարանի նախորդ կազմի կողմից հեռացվել էր նիստերի դահլիճից՝ դատարանի նկատմամբ վատ վերաբերմունք ցուցաբերելու համար։

Նախագահող դատավոր Տիգրան Սահակյանն արձանագրեց, որ Գրիգորյանին թույլ է տվել մասնակցել դատական նիստին՝ նկատի ունենալով, որ վերջինս պատշաճ վարքագիծ կցուցաբերի, ինչին ի պատասխան Գրիգորյանը հայտարարեց, թե դա դատավորներից է կախված։ Դատական նիստի մեկնարկից րոպեներ անց դատարանի նկատմամբ անհարգալից վերաբերմունքով կրկին աչքի ընկավ ամբաստանյալ Կյուրեղյանը, որը հեռացվեց դահլիճից՝ դատարանի նկատմամբ անհարգալից վերաբերմունքի համար։ Վերջինս հրաժարվել էր ոտքի կանգնել՝ դատարանի հարցերին պատասխանելիս և հանդես էր եկել հայտարարությամբ։

«Դուք երևի չգիտեք, բայց մեր չկանգնելն արհամարհանք է դատական իշխանության և ձեր հանդեպ»,- հայտարարեց Կյուրեղյանը, ինչից հետո վերջինիս նկատմամբ կիրառվեց դատական սանկցիա և հեռացվեց դահլիճից;

«Հեռացվում ենք, թե չէ՝ մեկ է, շան տղերք եք»,- հայտարարեց Կյուրեղյանը՝ դիմելով դատավորներին։

Հիշեցնենք, որ Երևանի ընդհանուր իրավասության դատարանը՝ դատավոր Մեսրոպ Մակյանի նախագահությամբ, հունիսի 24-ին հրապարակել է «Սասնա ծռեր» գործով դատավճիռը, համաձայն որի՝ Արայիկ Խանդոյանի նկատմամբ քրեական հետապնդումը դադարեցվել է՝ մահվան հիմքով, Պավել Մանուկյանը մեղավոր է ճանաչվել՝ դատապարտվելով ազատազրկման՝ 7 տարի 8 ամիս ժամկետով, Վարուժան Ավետիսյանը՝ 7 տարի 4 ամիս, Մխիթար Ավետիսյանը 7, 5, Էդվարդ Գրիգորյանը՝ ՝6,5 տարի, Գագիկ Եղիազարյանը՝ 7 տարի 5 ամիս, Արեգ Կյուրեղյանը՝ 7 տարի 1 ամիս, Սեդրակ Նազարյանը՝ 8 տարի 2 ամիս ժամկետով։ Նշենք, որ երկու ոստիկանի՝ Յուրի Տեփանոսյանի և Արթուր Վանոյանի սպանության մեջ մեղադրվող Սմբատ Բարսեղյանը, որի համար դատախազը պահանջել էր ցմահ ազատազրկում, դատապարտվել է ազատազրկման՝ 25 տարի ժամկետով, իսկ Արմեն Բիլյանը, որին մեղսագրվում էր ոստիկանության ծառայող գագիկ Մկրտչյանի սպանությունը, դատապարտվել է ազատազրկման՝ 4 տարի 11 ամիս ժամկետով։ Դատարանը, մասնավորապես, հիմնավորված չի համարել Բիլյանին սպանության համար առաջադրված մեղադրանքը եւ արդարացրել է նրան այդ մասով՝ հռչակելով վերջինիս անմեղությունը նրա մասնակցությունն ապացուցված չլինելու հիմքով։

Բիլյանը մեղավոր է ճանաչվել ՀՀ ՔՕ 235-րդ հոդվածի 3-րդ մասով, 218-րդ հոդվածի 3-րդ մասի 1-ին կետով, 238-րդ հոդվածի 4-րդ մասի 1-ին և 177-րդ հոդվածի 3-րդ մասի 1-ին և 2-րդ կետերով նախատեսված հանցագործությունների կատարման մեջ՝ կազմակերպված խմբի կողմից զենք-զինամթերք պահելու, կրելու, կազմակերպված խմբի կողմից պատանդ վերցնելու, կազմակերպված խմբի կողմից հրազեն շորթելու, կազմակերպված խմբի կողմից առանձնապես խոշոր չափերով գողություն կատարելու համար ։ Ավելին՝ Բիլյանի նկատմամբ ընտրված խափանման միջոց կալանավորումը փոխարինվել էր չհեռանալու մասին ստորագրությամբ՝ մինչև դատավճռի օրինական ուժի մեջ մտնելը, վերջինս ազատ էր արձակվել հենց դատական նիստերի դահլիճից։

Հեղինակ՝ Իզաբել Սահակյան

Աղբյուր` Փաստինֆո