Փաստ ինֆո

Երեկ գիշերվանից Հայաստանի հիմնական մայրուղիներից մեկի հսկայական մի հատվածն ադրբեջանական զինուժի կողմից պատանդառված է, ինչու՞ չեն կրակում։ «Փաստինֆո»-ի հետ զրույցի ժամանակ այս մասին ասաց ԱԺ նախկին պատգամավոր Նաիրա Զոհրաբյանը՝ դիմելով ՀՀ պաշտպանության նախարար Արշակ Կարապետյանին։

Նաիրա Զոհրաբյանը մանրամասնեց՝ երեկ երեկոյան, երբ ադրբեջանական զինված ուժերը փակել էին Գորիս-Կապան միջպետական ճանապարհը, այնտեղ շրջափակված քաղաքացիներից զանգել էին նրան և տեղեկացրել, որ շրջափակման մեջ են հայտնվել։
«Աբսուրդ է, որ 2 ժամ մեր մեքենաները, քաղաքացիները պատանդառված են եղել, միջպետական մայրուղին էլ փակված է եղել, և այս պահին էլ դեռ բանակցություններն ընթանում են, սակայն որևէ պաշտոնատար անձ կամ կառույց գիշերը հայտարարությամբ հանդես չի եկել։ Այսինքն եթե ինձ չահազանգեին և չիրազեկեին, ես էլ այդ մտահոգությունը չտեղադրեի, ապա որևէ մեկը չէր իմանա, թե ինչ է կատարվում այնտեղ»,-նշեց Նաիրա Զոհրաբյանը։

Վերջինս նկատում է՝ խնդիրն այն է, որ մեր պետական, հիմնական մայրուղիները վտանգված են և մարդիկ այդ ճանապարհով գնալիս պարզապես կարող են գերեվարվել կամ շրջափակման մեջ հայտնվել ադրբեջանական սահմանապահ զինուժի կողմից։

«Սա է խնդիրը, իսկ այդ ընթացքում ԱԺ-ում քացիներով իրար են հարվածում, իրար վրա շշեր նետում, երբ այսօր ունենք բացարձակապես այլ օրակարգ, որը կարծես որևէ մեկին չի հետաքրքրում։ Եթե երեկ մեր հայրենակիցները բարեհաջող կերպով տարհանվել են, դա դեռ չի նշանակում, որ 1-2 ժամ կամ մի քանի օր հետո նույն իրավիճակն ավելի վատ հետևանքներով չի կարող կրկնվել։ Ինքս այլևս կվախենամ երեխայիս հետ այդ ճանապարհով անցնել։ Բնականաբար ինձ նման բազմաթիվ քաղաքացիներ կլինեն, բայց մարդիկ նաև այդ ճանապարհով տուն են չէ՞ գնում, այդտեղ են բնակվում»,-նշեց Նաիրա Զոհրաբյանը։

Նրա խոսքով այս պահին անհասկանալի իրավիճակ է ստեղծվել։ ԱԱԾ-ն հորդորում է հետևել միայն պաշտոնական տեղեկատվության, իսկ պաշտոնական տեղեկատվություն, թե ինչ է կատարվում այնտեղ, դեռ չկա։ Միայն տեղյակ ենք, որ ճանապարհը շարունակում է փակ մնալ։
Նաիրա Զոհրաբյանը նաև դիմեց ՀՀ պաշտպանության նախարար Արշակ Կարապետյանին, ասելով.

«Ինչու՞ չեք կրակում։ Ադրբեջանական զինուժը գիշերվանից պատանդառել է Հայաստանի կարևորագույն մայրուղիներից մեկը, ինչու՞ չեք կրակում։ Թե՞ դա ընդամենը ձեր հերթական պոպուլիստական հայտարարությունն էր»։

Ավելի վաղ հայտնել էինք, որ օգոստոսի 25-ին ժամը 23:00-ի սահմաններում ադրբեջանական կողմը փակել է Կապան-Գորիս միջպետական ճանապարհի Կարմրաքար-Շուռնուխ հատվածը: Նշված հատվածում գտնվող տրանսպորտային միջոցները տարհանվել են: Աշխատանքներ են իրականացվում ճանապարհը բացելու, մարդկանց և տրանսպորտային միջոցների տեղաշարժի բնականոն աշխատանքը վերականգնելու ուղղությամբ։

Աղբյուր` Փաստինֆո