Փաստ ինֆո

Սերժ Սարգսյանը սահմանադրորեն ընտրված նախագահ է, ինչ պետք է անեմ։ Այս մասին լրագրողների հետ զրույցում ասաց «Քաղաքացիական պայմանագիր» խմբակցության պատգամավոր, «Գռզո» մականունով հայտնի օլիգարխ Խաչատուր Սուքիասյանը։

Սուքիասյանը շարունակեց պնդել իր նախկինում արած հայտարարությունները՝ նախկին իշխանությունների կողմից գործարարներին կեղեքելու վերաբերյալ։

Ճեպազրույցի ընթացքում լրագրողներից մեկը Սուքիասյանին ցույց տվեց նախկինում արված լուսանկարը, որտեղ երևում է, թե ինչպես է ինքը բաժակ բռնել Սերժ Սարգսյանի հետ, ինչին ի պատասխան Սուքիասյանը նախ բորբոքվեց, ապա հայտարարեց, որ Ամանորին բոլոր գործարարներին են հրավիրել, այդ թվում՝ իրեն։

«Կեղեքել է, բոլորին է կեղեքել, միայն ինձ չէ։ Բարձրաձայնել եմ, խոսել եմ, ամեն անգամ մի նոր բան են ասել։ Ինքը չգիտե՞ր Արմեն Ավետիսյանն ով է »,- նշեց Գռզոն՝ հայտարարելով, որ նախորդ ԱԱԾ ղեկավարներից մեկը գալիս և ասում էր՝ թղթապանակները տարել է, մինչդեռ դա պետական գաղտնիք է. «Վերջում պատասխանեցի մի բան՝ այդ պապկաներն ուղղակի նրա համար է, որ այս մեկին կամ մյուսին շորթեն, բայց եթե մարդը գիտի ով է, ոչ մի պապկայից էլ չի վախենում»։

Լրագրողի դիտարկմանը, որ բոլորս հիշում ենք, որ Սերժ Սարգսյանը Սուքիասյանին պատկանող հաստատությունների բացմանն է ներկա եղել, Սարգսյանն ինչ ներդրում է ունեցել, Սուքիասյանը պատասխանեց, որ Սարգսյանը չէ, որ պետք է ասի, թե ինքն ինչ անի, բացի այդ, երբ Սերժ Սարգսյանը գնում է այս կամ այն շինության բացմանը, գոյություն ուներ նախագահական ինստիտուտներ, որը որոշում էր, թե որ լրատվամիջոցները մասնակցեն և ինչ հեռավորությունից։

«Մեզ համար՝ որպես սեփականատիրոջ, որպես կառուցողի, դա շատ դրական էր, երբ ամբողջ պետական կամ կառավարման համակարգը գալիս էր բացման։ Ուրիշ բան մի փնտրեք։ Այդ ժամանակ ինքս հարց էի առաջ քաշել, որ, եթե գալիս են, գան՝ մետրոյով։ Մեկն էլ հարցնում՝ բա հանդիպում ես։ Բա, իհարկե, հանդիպում ես։ Հիմա որ մեկի գլուխը ցավում է, գնում է բժշկի մոտ։ Ամեն մեկն իր հասցեն ունի։ Իր աշխատասենյակում գրված է ՀՀ նախագահ, ես չէ, որ պետք է գնայի ասեի՝ գնա։ Ընտրված նախագահ է, ինչ պետք է անեի, սահմանադրորեն»,- հայտարարեց Սուքիասյանը։

Աղբյուր` Փաստինֆո