Փաստ ինֆո

Արդեն երկու օր է ԱԺ դահլիճում տեղի է ունենում ինձ համար խիստ անընդունելի, տհաճ, այս շենքին ոչ հարիր մի իրավիճակ։ Այս մասին ԱԺ-ում ասաց «Հայաստան» խմբակցության պատգամավոր Արթուր Ղազինյանը։ 

«Մեղադրում են ընդդիմությանը՝ բառեր օգտագործելու, որակումների մեջ։ Հիշում ենք բոլորս, թե այսօրվա իշխանության՝ մինչև իշխանության գալը ինչ էր կատարվում։ Վերջին հաշվով, կարելի է պահանջել մի բան, ինչն ինքդ մերժել ես առաջին իսկ րոպեից, բայց երբ որ այն, ինչ կարելի էր քեզ, հիմա արդեն չի կարելի ուրիշին, երկակի ստանդարտների շատ վառ դրսևորում է»,- նշեց Ղազինյանը՝ հավելելով, որ այսօր բանախոսն իր խոսքում երկու անգամ վիրավորել է բանակի գեներալ-գնդապետին, Արցախի հերոսին՝ որակելով դավաճան և դիմելով վիրավորական ոճով։

Ղազինյանի խոսքով՝ դավաճան կարելի է որակել ծառայությունից փողով ազատվողին, զինվորական կոմիսարիատին, գործարքն իրականացնողին, բայց բոլոր նախարարներին դավաճան որակել միայն նրա համար, որ իրենց ենթակայության ներքո մի ամբողջ մեծ համակարգում եղել են դատապարտելի, արատավոր երևույթներ, ապա դա բոլորի վրա էր տարածվում և այդ վիրավորանքն ուղղված էր բոլոր նախկին ՊՆ նախարարներին, գուցե նաև՝ ներկայիս ՊՆ նախարարին, որովհետև որևէ մեկը չի կարող երաշխավորել, որ նման բան չկա։

«Մարդկայնորեն հասկանում եմ պարոն գեներալի պոռթկումը, հասկանում եմ, որ զինվորականին, որն իր ամբողջ կյանքն է դրել հայրենիքի պաշտպանությանը, նման ձևով պիտակավորել և վերջում էլ՝ «արա»-ով դիմել, այդ պարագայում էմոցիոնալ պոռթկում տեղի ունեցավ, ինչը վերածվեց տեսանք, թե ինչի՝ օդում շշեր էին պտտվում տարբեր ուղղություններով, մեկը՝ մեկին հարվածում, ընդ որում, մարդիկ, որոնք ոչնչի չէին միջամտում, հարվածներ եկան »,- նշեց Ղազինյանը՝ ընդգծելով, որ ընդդիմությունը երբեք բռնությունը որպես քաղաքական զենք չեն օգտագործում, նույնիսկ՝ հայրենիքի փրկության շարժման ժամանակ, երբ փողոցում էին գտնվում, բռնության որևէ գործողություն, որևէ ակտ ոչ միայն թույլ չեն տվել, որ լինի, այլև՝ փորձել են կանխել։

Նրա խոսքով՝ փորձել են լինել օրինականության սահմաններում, բռնություն թույլ չտալ, միգուցե եղել են հատվածային էմոցիոնալ դրսևորումներ, բայց փողոցային մեծ ակցիայի ժամանակ մեծ ցնցումներ չեն եղել։

«Մենք բռնություն չենք ուզում, մենք թվակազմի առավելություն ցույց չենք տալիս, բռունցքը մեզ համար երբեք չի համարվել քաղաքական զենքի օգտագործման միջոց։ Ես գտնում եմ, որ այն, ինչ տեղի ունեցավ այս պահին, դրա համար և առհասարակ բոլոր իրավիճակներում՝ իրավիճակի պատասխանատուն լինում է իշխանությունը։ Դա աքսիոմատիկ կանոն է, իշխանությունն է պատասխանատուն և դրական, և բացասական երևույթների համար։ Եթե դա տեղի է ունեցել, նշանակում է, որ իշխանությունն ինչ-որ հարցում թերացել է։ Բռունցքներին գործը հասցնելն անընդունելի է, հատկապես հետևից հարվածել կանգնած մարդուն՝ դա ևս անընդունելի է, ոչ տղամարդկային։ Եթե որոշենք բռունցքով՝ լավ տեղ չի տանելու, հավատացնում եմ ձեզ, որովհետև բոլորս լավ ճանաչում ենք իրար և գիտենք, թե ով՝ ով է այս երկրում և ով ինչի է ունակ։ Դա լավ բան չէ, չի կարելի դա անել»,- նշեց Ղազինյանը՝ հավելելով, որ հնչող սուր գնահատականներին պետք է տալ քաղաքական պատասխան ։

Աղբյուր` Փաստինֆո