Փաստ ինֆո

Դուք չեք կարող ասել, թե ԱԺ կանոնակարգ օրենքը ՊՊԾ-ին ինչ լիազորություններ է վերապահում։ Ես կարող եմ ասել, որ պատգամավորին քաշքշելու, պատահական կամ ոչ պատահական վերնաշապիկը ճղելու լիազորություն չի նախատեսում։ ԱԺ-ում այս մասին ասաց «Հայաստան» խմբակցության պատգամավոր Արամ Վարդևանյանը՝ դիմելով ՀՀ վարչապետ Նիկոլ Փաշինյանին։

Արամ Վարդևանյանն անդրադարձավ 2020-ի դեկտեմբերի 12-ին հրապարակված ձայնագրությանը, որը վերաբերում է ԱՀ նախագահ Արայիկ Հարությունյանի և Արցախի ԱԺ նախկին պատգամավոր Ռուսլան Իսրայելյանի խոսակցությանը։

«Ռուսլան Իսրայելյանն ասում է, որ ամեն դեպքում պետք չէր հեռուստացույցով ասել, նկատի ունի այն, որ թշնամին 5 կմ հեռու է Շուշիից։ Արայիկ Հարությունյանը պատասխանում է՝ հակառակը, թող զգաստանան, կռիվը ժամերի ընթացքում կանգնացնեն, մի քիչ քաղաքական բաների մեջ ընկնեն։ Արայիկ Հարությունյանն ասում է՝ 10 օր է ասում եմ մարդ տվեք, Ստեփանակերտը պահեմ»,- պատգամավորն ընթերցեց ձայնագրության տեքստային տարբերակը և վարչապետից հետաքրքրվեց՝ արդյոք ծանո՞թ էր այս ձայնագրությանը, և քանի որ դատախազությունն այդ ձայնագրության հիման վրա քրեական գործ է հարուցել, վարչապետը երբևէ այս հարցով նախաքննական մարմնում գտնվե՞լ է։

Նիկոլ Փաշինյանն ասաց, որ տեղյակ չէ այդ ձայնագրությունից։

«Չգիտեմ՝ այդ ձայնագրությունն օրինական է արվել, թե ապօրինի, բայց ձեր ասած հանգամանքներից տեղյակ եմ։ Նոյեմբերի 9-ի հայտարարությունը ստորագրվել է նաև այդ հանգամանքները հաշվի առնելով։ Ձեր հարցերի մեջ այնքան հակասություն կա։ Հիմա մեկ ասում եք պատերազմ կանգնացնել, մեկ ասում եք հայրենիքը կորցնել։ Պատերազմ կանգնացնելը գին է ունենում։ Հիմա այդ ձեր նշած հայրենիքը պահելու համար պե՞տք էր պայքարել, թե՞ պետք չէր»,-նշեց Նիկոլ Փաշինյանը։

Վարչապետը նշեց, որ ինքը կանգնել է ժողովրդի դատի առաջ, և ժողովուրդն իր դատավճիռը կայացրել է, և ընդդիմությունը ստիպված է այդ դատավճռի հետ հաշվի նստել։

Արամ Վարդևանյանն էլ ընդգծեց՝ ժողովուրդը դատավճիռ չի կարող կայացնել։ Ժողովուրդը կարող է ընտրությունների միջոցով գնահատական տալ, իսկ դատական իշխանությունը նույնիսկ ժողովրդի այդ դատավճռի պայմաններում էլ կարող է այլ վճիռ կայացնել։ Ավելին, Ձեր տրամաբանությամբ միջազգային հանցագործություններ գործած Հիտլերը վերընրվելու դեպքում որեւէ պատասխանատվության չպետք է ենթարկվեր։ «Նման իրավաբանություն չկա»,- ասաց Վարդեւանյանը։

Աղբյուր` Փաստինֆո