Փաստ ինֆո

Հայաստանում 1 աշխատողը 1 ժամում ստեղծում է միջինը 6.8 դոլար արդյունք։ Այսօր ԱԺ ամբիոնից հայտարարեց ՀՀ վարչապետ Նիկոլ Փաշինյանը` ներկայացնելով ՀՀ կառավարության 2021-26թթ–ի գործունեության ծրագրի տնտեսական հատվածը։

Վարչապետի խոսքով սա շատ վատ ցուցանիշ է։ ՌԴ–ում նույն արտադրողականության ցուցանիշը կազմում է 11.7, ԵՄ–ի միջին ցուցանիշը` 42.7 դոլար։ ԵՄ երկրներ կան, որտեղ արտադրողականության ցուցանիշը ավել է 100 դոլարից։

«Ես կարծում եմ, որ այս ցուցանիշն ի ցույց է դնում տնտեսության ոլորտում մեր ունեցած ամենակարևոր բազային խնդիրներից մեկը»։

Հայաստանի ՀՆԱ–ում գյուղատնտեսությունն ավելի մեծ կշիռ ունի, մինչդեռ այդ ոլորտում արտադրողականության ցուցանիշը շատ ավելի ցածր է` ժամում 3 դոլար։

«Մեր քաղաքացիներն ասում են` առավոտից երեկո աշխատում ենք, բայց մեր աշխատանքի արդյունքը չենք տեսնում։ Այ, էս նախադասությունը, եթե փորձենք վերաձևակերպել բանաձևի, դա աշխատանքի արտադրողականությունն է։ Ինչի՞ է, որ մենք առավոտից երեկո չարչարվում ենք, բայց բարեկեցություն դրա արդյունքում չի ստեղծվում, որովհետև մեր աշխատանքի արտադրողականությունը չափազանց ցածր է»։

Փաշինյանը հավելեց, որ կառավարության համար ռազմավարական ուղղություն է՝ նպաստել արտադրողականության մեծացմանը։

Վարչապետի խոսքով, կառավարության առաջարկած փոփոխություններում ամենակարևորը գյուղատնտեսության ոլորտի 11 ծրագրերն են։

Արտադրողականության ցուցանիշը բարձրացնելու համար նախ և առաջ պետք է իրականացնել հողային ռեֆորմ, ինտենսիվ այգիների հիմնումը, ոռոգման կաթիլային համակարգին անցումը, լիզինգային ծրագրերն ու գյուղատնտեսության ապահովագրության խթանումը։

Փաշինյանը նկատեց, որ այս տարի ոռոգման խնդիրները նկատելի էին, բայց արձանագրեց՝ ոռոգման այն կուլտուրան, որ գոյություն ունի ՀՀ-ում՝ 19-րդ դարի կուլտուրա է, գյուղատնտեսության ոլորտում զարգացում չի կարող ապահովել։ Ուստի առաջարկվում է անցնել կաթիլային ոռոգման։

Ինտեսնիվ գյուղատնտեսության անցումը, ըստ Փաշինյանի՝ հնարավորություն կտա գյուղացուն տեսնել և վայելել բարեկեցությունը։

Աղբյուր` Փաստինֆո