Փաստ ինֆո

Թշնամին պատերազմ է սկսել, բայց երկրի ղեկավարն առավոտյան հասնում է ֆեյսբուքին ու բանաստեղծություն գրում։ Կարո՞ղ եք այդպիսի մարդուն վստահել երկիրը։ Այս մասին ԱԺ-ում հայտարարեց «Հայաստան» խմբակցության պատգամավոր Գեղամ Մանուկյանը՝ դիմելով Նիկոլ Փաշինյանին։ 

«Պատկերացնենք երկիր, որտեղ առավոտյան հայտնի է դառնում, որ թշնամին պատերազմ է սկսել, առաջին բանը, որ երկրի ղեկավարն անում է՝ հասնում է ֆեյսբուքին, բանաստեղծություն է դնում։ Ռազմական դրություն է մտցվում երկրում, երկրի ղեկավարը, խախտելով ռազմական դրության սահմանափակումները, ռազմական զինտեխնիկայի տեղաշարժի տեսանյութ է տարածում, երբ ՊՆ մամուլի քարտուղարն ասում է՝ խելքի եկեք, ռազմական տեխնիկայի տեղաշարժ չի կարելի հրապարակել, հետո երևի խելքի են գցում, ասում են՝ պարոն ղեկավար, հեռացրու։ Հետո գալիս է նա խորհրդարան՝ առանց պատրաստված գրավոր տեքստի, երբ երկիրը պատերազմի մեջ է, ուղերձներ պետք է հղել հասարակությանը, թշնամուն, միջազգային կառույցներին, բանավոր ելույթ է ունենում և հռետորաբանությամբ է զբաղվում»,- նշեց Մանուկյանը՝ հետաքրքրվելով Փաշինյանից, թե արդյոք կարո՞ղ ենք այդպիսի մարդուն վստահել երկիրը։

Ինչ վերաբերում է ՊՊԾ-ն՝ ԱԱԾ-ից առանձնացնելու և վարչապետին կցելու մասին նախագծին, Մանուկյանն ընդգծեց, որ շուրջ երեք տասնամյակ այդ պետական ծառայությունը բոլոր պետական պաշտոնյաների անվտանգությունն է ապահովել։

«Ճիշտ է՝ երեք տարի է, ինչ արևածաղկի նման փոխվում են պատասխանատուները, բայց պատկերացրեք, որ այդ ՊՊԾ-ն՝ իր գեներալի կոչում ստացած հայտնի հրամանատարով, ենթարկվի ուղղակի Նիկոլ Փաշինյանին, դեռ ինչքան քթեր կջարդվեն և ինչքան պատգամավորի գլուխներ կկոտրվեն»- նշեց Մանուկյանը։

Գեղամ Մանուկյանի հարցին ի պատասխան Փաշինյանը հայտարարեց, թե ՀՀ Սահմանադրությամբ է կարգավորված՝ ում վստահել երկիրը և ինչպես է կարգավորվում, այն սուբյեկտը, որն ունի այդ իրավասությունը, կայացրել է իր որոշումը և անկախ նրանից, թե մեզնից յուրաքանչյուրն ինչքանով է համաձայն այդ որոշման հետ և ինչքանով համաձայն չէ՝ պետք է ընդունի ի գիտություն։

Անդրադառնալով ՊՊԾ-ի վերաբերյալ հարցին՝ Փաշինյանը հայտարարեց, թե կառույցը՝ անկախության ստեղծման առաջին օրվանից գերատեսչական ճամփորդության մեջ է։

Մանրամասները՝ տեսանյութում

Աղբյուր` Փաստինֆո