Փաստ ինֆո

Դատավոր Աննա Դանիբեկյանը խուսափում է արդարադատություն իրականացնելուց։ Այս մասին ՀՀ երկրորդ նախագահ Ռոբերտ Քոչարյանի և ՀՀ նախկին փոխվարչապետ, «Հայաստան» խմբակցության պատգամավոր Արմեն Գևորգյանի գործով դատական նիստին հայտարարեց Գևորգյանի պաշտպան Էրիկ Ալեքսանյանը։

Նշենք, որ դատավոր Աննա Դանիբեկյանն այսօր հետաձգել է Արմեն Գևորգյանի անձեռնմխելիության հիմքով քրեական գործի վարույթը կասեցնելու և նրա անձեռնմխելիության հիմքով ՍԴ դիմելու մասին պաշտպաններ Էրիկ Ալեքսանյանի և Հովհաննես Խուդոյանի միջնորդությունները։

«Փաստինֆո»-ի թղթակցի հաղորդմամբ՝ Դանիբեկյանի որոշումից հետո փաստաբան Էրիկ Ալեքսանյանը հիշեցրեց, որ հունիսի 29-ին կայացած դատական նիստերի ընթացքում դատավոր Աննա Դանիբեկյանն արձանագրել է, որ տեսնում է խնդիր՝ Արմեն Գևորգյանի անձեռնմխելիության հաղթահարման և հետագա քրեական հետապնդումն իրականացնելու շարունակականության վերաբերյալ։ Բացի այդ՝ նախորդ դատական նիստին Դանիբեկյանը, կրկին տեսնելով այդ խնդիրը, փորձ է արել չքննարկել այդ հարցը, հաշվի առնելով այն հանգամանքը, որ «Հայաստան» դաշինքը գուցե դիմել է ՍԴ։

«Հարգելի դատարան, Դուք՝ որպես դատարան, եթե տեսնում եք սահմանադրականության խնդիր՝ այս կամ այն նորմի կիրառման վերաբերյալ՝ անկախ նրանից, թե սուբյեկտ կլինի, որը կդիմի ՍԴ, թե ոչ, Դուք՝ որպես դատարան, ունեք իմպերատիվ պարտականություն՝ դիմելու ՍԴ այդ հարցի լուծման կապակցությամբ»,- նշեց Ալեքսանյանը՝ հավելելով, որ այսօր դատարանը ևս հետաձգել է միջնորդության լուծման հարցը՝ պայմանավորելով «Հայաստան» խմբակցության կողմից ՍԴ դիմելու հարցով։

«Հարգելի դատարան, գտնում եմ, որ Դուք փաստացի խուսափում եք արդարադատություն իրականացնելուց։ Ես նկատում եմ և ունեմ ողջամիտ ենթադրություն, որ Դուք փոխել եք Ձեր դիրքորոշումը, ուստի, ունեմ կասկածներ Ձեր անկողմնակալության և որպես դատավորի իրավական հմտությունների վերաբերյալ»,- նշեց Ալեքսանյանը՝ հայտնելով ինքնաբացարկի միջնորդություն ներկայացնելու մտադրության մասին, ուստի, խնդրում է հետաձգել դատական նիստը՝ գրավոր միջնորդություն ներկայացնելու հնարավորության համար։

Նախագահող դատավոր Աննա Դանիբեկյանը նշեց, որ անհրաժեշտություն չի տեսնում դատական նիստը հետաձգելու և առաջարկեց մեղադրող կողմին՝ հրապարակել մեղադրական եզրակացությունը, սակայն փաստաբան Հայկ Ալումյանը հիշեցրեց, որ Վերաքննիչ քրեական դատարանում քննվում է բողոք՝ ՀՀ քրեական օրենսգրքի 300.1-րդ հոդվածով հետապնդումը դադարեցնելու վերաբերյալ, ուստի՝ ուզում է հասկանալ՝ առաջին ատյանի դատարանը որ մասով է գործն ուղարկվել Վերաքննիչ դատարան՝ հասկանալու, թե ինչ ծավալի մասին է խոսքը։ Ալումյանը նշեց, որ ուղղակի անհրաժեշտություն է հասկանալ, թե գործի որ մասն է ուղարկվել Վերաքննիչ դատարան և որ մասն է այժմ գտնվում առաջին ատյանի դատարանում։ Ալումյանը պարզաբանեց, որ քրեական գործով ՀՀ ՔՕ 300.1-րդ հոդվածի մասով կարճվել է, բայց այդ մասը չի առանձնացվել և եթե դատարանը մաս անջատեր և նոր մասին շնորհվեր առանձին համար, ապա այդ դեպքում հասկանալի կլիներ, թե որ գործն է գտնվում Վերաքննիչ քրեական դատարանում, որ գործը՝ առաջին ատյանի դատարանում։

«Քանի դեռ քրեական գործով մաս անջատված չէ, գործ ունենք մեկ քրեական գործի հետ»,- նշեց Ալումյանը՝ հավելելով, թե ցանկանում է հասկանալ, թե ապացույցների որ ծավալն են առաջին ատյանի դատարանում ուսումնասիրվելու, հակառակ դեպքում՝ աշխատանքն անհնար է դարձվում։

Դատավոր Դանիբեկյանն էլ նշեց, թե որևէ այլ պարզաբանում տալու անհրաժեշտություն չի տեսնում։

Փաստաբան Էրիկ Ալեքսանյանը, արձագանքելով հետաքրքրվեց դատարանից՝ արդյոք դատարանն արդեն որոշել է մերժել իր միջնորդությունը, քանի որ ինքը բարձրաձայնում է դատարանի նկատմամբ կասկածների մասին, սակայն դատարանը հնարավորություն չի տալիս միջնորդություն ներկայացնելու։

«Դուք ինձ հնարավորություն տալի՞ս եք ինքնաբացարկի միջնորդություն ներկայացնելու, թե ոչ։ Հարգելի դատարան, Դուք թույլ չեք տալիս, որ ես լիարժեք պաշտպանություն իրականացնեմ, ես լքում եմ դատական նիստերի դահլիճը, Դուք խուսափում եք արդարադատություն իրականացնել, Դուք խուսափում եք հնարավորություն ընձեռնել պաշտպանության կողմին՝ լիարժեք արդար դատաքննության իրավունքն իրականացնել»,- նշեց Ալեքսանյանը՝ լքելով դատական նիստերի դահլիճը՝ դատարանին ինքնաբացարկ հայտնելու մասին միջնորդություն ներկայացնելու։

Դատարանն արձանագրեց, որ Ալեքսանյանը լքել է դատական նիստերի դահլիճը՝ առանց դատարանի թույլտվության։ Մեղադրող դատախազ Գևորգ Բաղդասարյանն էլ հայտարարեց, թե պաշտպանության կողմը խիստ արհեստական գործողություններ սկսեց՝ մեղադրական եզրակացությունը մեղադրանքի կողմից չհրապարակելու նպատակով։

Դատական նիստը հետաձգվեց։

Հիշեցնենք, որ նշված դրվագով Ռոբերտ Քոչարյանը մեղադրվում է առանձնապես խոշոր չափերով կաշառք ստանալու, իսկ Արմեն Գևորգյանը՝ առանձնապես խոշոր չափերով կաշառք ստանալու և հանցավոր ճանապարհով ստացված գույքն օրինականացնելու մեջ։

Հեղինակ՝ Իզաբել Սահակյան

Աղբյուր` Փաստինֆո