Փաստ ինֆո

ԱԺ «Հայաստան» խմբակցության պատգամավոր Արթուր Ղազինյանը նախքան հարց ուղղելը վարչապետ Նիկոլ Փաշինյանին, անդրադարձավ նիստերի դահլիճում տեղի ունեցած հրմշտոցին, անվտանգության աշխատակիցների բռնի պահվածքին։

«Զազրելի տեսարան էր, զինվորական համազգեստով մի քանի տասնյակ մարդ հարձակվել էին երիտասարդ աղջկա վրա։ Դա տղամարդուն, հային ոչ վայել վարքագիծ էր, ինչը տեղի ունեցավ հիմնական զեկուցողի արտահայտությունից հետո, որ քիչ են անում, շատ պետք է անեն։ Դա սադրանք էր, հրաման, որ անցնեն գործողությունների»։

Ղազինյանը՝ դիմելով Փաշինյանին նշեց, թե վերջին ամիսներին վարչապետի կողմնակիցները, տարբեր խմբեր, ֆեյքային ֆաբրիկաներ տարածում են այսպիսի թեզ՝ «խեղճ Նիկոլն ինչ աներ, նախկինները Ղարաբաղը ծախել էին, խեղճ հարիֆի գլխին ջարդվեց։ Դուք համաձա՞յն եք այդ ձևակերպման հետ»։

Ի պատասխան Նիկոլ Փաշինյանն ասաց, թե ուրախ է, որ միասին 44-օրյա պատերազմը քննող քննիչ հանձնաժողով է ձևավորելու և բոլոր հարցերի պատասխանները գտնելու հնարավորություն կունենան։

«Եվ ես իմ ելույթում արդեն նշեցի, ես չեմ կարծում, որ այստեղ մենք պետք է հարցի զուտ ռազմական ասպեկտը քննարկենք, մենք պետք է քննարկենք այդ ամբողջն իր պատմությամբ, իր բոլոր համատեքստերով։ Եվ ես կարծում եմ, որ նաև բանակցային գործընթացների վերաբերյալ հանձնաժողովը տեղեկություններ ստանալու հնարավորություն պիտի ունենա։

Ամենատարբեր կարծիքներ կան՝ և ձեր կարծիքը կա, այո, բայց այդ կարծիքի վեկտորի հետ կապված խնդիրներ էլ կան, որովհետև շատ հնարավոր է, որ ինչ-որ բան եղել է կազմակերպված։ Մեր խնդիրն է պարզել՝ ով է կազմակերպել, ի՞նչ նպատակով ու ի՞նչ նկատառումներով»։

Նիկոլ Փաշինյանը հորդորեց դուրս գալ նախընտրական դիսկուրսից։ «Մենք արտահերթ ընտրություններն արեցինք նոյեմբերի 9-ից մինչև հունիսի 20-ի դիսկուրսի լուծումը տալու համար։ Եթե դուք ուզում եք այդ դիսկուրսն անընդհատ մենք շարունակենք, մենք այստեղ հավաքվել ենք ինչի՞ համար»,- նշեց նա։

Արթուր Ղազինյանն արձագանքեց՝ Փաշինյանի գլխին ոչինչ չի կոտրվել և հնարավորություն ուներ կանխելու այն, ինչ տեղի ունեցավ, հանարավորություն կար քրեական գործեր հարուցել, նախաքննություն իրականացնել, մերժել կամ հաստատել։

«Իմը կարծիք չէ, դա համոզմունք է՝ հիմնված կոնկրետ փաստերի վրա»։

Աղբյուր` Փաստինֆո