Փաստ ինֆո

«Իզմիրլյան» ԲԿ նախկին տնօրեն, «Հայաստան» խմբակցության պատգամավոր Արմեն Չարչյանը կկալանավորվի։ Վերաքննիչ քրեական դատարանը՝ դատավոր Ռուբիկ Մխիթարյանի նախագահությամբ, բավարարել է Չարչյանին գրավի դիմաց ազատ արձակելու մասին որոշման դեմ դատախազության բողոքը՝ բեկանելով առաջին ատյանի դատարանի որոշումը և անփոփոխ թողել մինչդատական վարույթում Չարչյանի նկատմամբ ընտրված խափանման միջոց կալանավորումը։ Այս մասին «Փաստինֆո»-ի հետ զրույցում հայտնեց Չարչյանի պաշտպան Էրիկ Ալեքսանյանը։

Ինչպես արդեն տեղեկացրել ենք՝ Երևանի ընդհանուր իրավասության դատարանը՝ դատավոր Վահե Միսակյանի նախագահությամբ, գործի՝ դատաքննության նախապատրաստման փուլում  հուլիսի 21-ին նրան կալանքից ազատել էր՝ բավարարելով Արմեն Չարչյանին գրավի դիմաց ազատ արձակելու մասին պաշտպանների միջնորդությունը՝ գրավի չափ սահմանելով 15 մլն ՀՀ դրամ։ Մեղադրող դատախազ Մարգարյանը վերաքննիչ բողոք էր ներկայացրել՝ պահանջելով բեկանել Արմեն Չարչյանի նկատմամբ ընտրված խափանման միջոց կալանավորումը գրավով փոխարինելու մասին դատարանի որոշումը, իսկ Չարչյանի նկատմամբ նախկինում ընտրված խափանման միջոց կալանավորումը համարել հիմնավորված և թողնել անփոփոխ։

Բողոքը նախ մակագրվել էր դատավոր Սեւակ Համբարձումյանին, որը ինքնաբացարկ էր հայտնել, ինչից հետո այն վերամակագրվել էր Ռուբիկ Մխիթարյանին, որն էլ այսօր բավարարել է դատախազության բողոքը։  

Արմեն Չարչյանի պաշտպան Էրիկ Ալեքսանյանը «Փաստինֆո»-ի հետ զրույցում ընդգծեց, որ դատարանի որոշումն ակնհայտ ապօրինի է։ Նրա փոխանցմամբ՝  Չարչյանը մեկ ամիս է, ինչ ազատության մեջ էր գտնվում, ոչ մի ազդեցության փորձ անգամ չի կատարել, նա այլևս «Իզմիրլյան» ԲԿ տնօրեն չէ, այսինքն՝ իր կարգավիճակից ելնելով էլ որևէ մեկի նկատմամբ չէր կարող ազդեցություն ունենալ։ Բացի այդ՝ Չարչյանի դեմ որևէ մեկը մեղադրական բնույթի ցուցմունք չի տվել, որ տրամաբանություն լիներ ցանկալի ցուցմունքներ կորզելու նպատակով ազդեցություն գործադրելու։

«Այսինքն՝ ոչ մի բեկանելու հիմք այս դատարանը չի ունեցել։ Այս դատավորը պարզապես երևի անգամ իր շողքից է վախենում, իր ինչ-որ ներքին վախերն ունի, դրա համար է նման որոշում կայացրել, բայց այս որոշումը ոչ մի աղերս չունի ոչ օրենքի հետ, ոչ իրավունքի հետ, սա խայտառակություն է։ Այլ մեկնաբանություն չեմ կարող տալ, սա ազգի խայտառակություններից մեկն է, թող այս օրը լավ հիշեն»,- նշեց Ալեքսանյանը։

Վերաքննիչ բողոքի քննության ընթացքում պաշտպան Էրիկ Ալեքսանյանը բարձրացրել է նաև Չարչյանի՝ պատգամավորի կարգավիճակի հիմքով ձեռք բերած անձեռնմխելիության հարցը, մասնավորապես, Ալեքսանյանը նշել էր, որ դժվար է պատկերացնում, թե ինչպես պետք է Չարչյանին կալանավորելու մասին որոշում կայացվել՝ նկատի ունենալով, որ Չարչյանն ունի անձեռնմխելիություն և համապատասխան մարմնի թույլտվությունը չկա։ Պաշտպանը նշեց, որ դեռևս չի ստացել դատարանի որոշումը, հետևաբար, չի կարող հայտնել, թե դատարանն ինչպես է անդրադարձել հարցին։

Արմեն Չարչյանի նկատմամբ ընտրված խափանման միջոց կալանավորումն անփոփոխ թողնելու մասին Վերաքննիչ դատարանի որոշումն ուժի մեջ է մտնում անմիջապես, քաղվածքը ստանալուց հետո Չարչյանը կտեղափոխվի քրեակատարողական հիմնարկ։

Հիշեցնենք, որ տելեգրամյան մի ալիքում հրապարակվել էր ձայնագրություն, համաձայն որի՝ «Իզմիրլյան» բժշկական կենտրոնի տնօրեն Արմեն Չարչյանը հունիսի 18-ի առավոտյան աշխատակիցների հետ հանդիպմանը հորդորել է, որ աշխատակիցները պարտադիր կարգով մասնակցեն ընտրություններին։ Չարչյանը նշել է, որ եթե որևէ մեկը չմասնակցի ընտրություններին, ապա կիմանա այդ մասին։

Ձայնագրության հրապարակումից հետո հաշված ժամերի ընթացքում ՀՔԾ-ում հարուցվել է քրեական գործ՝ ՀՀ քրեական օրենսգրքի 154.2-րդ հոդվածի 4-րդ մասի 2-դ կետի հատկանիշներով, որի շրջանակներում նախ բերման են ենթարկել Չարչյանին և տեղափոխել ՀՔԾ, ապա ձերբակալելու որոշում կայացրել։

Պաշտպանները բողոք են ներկայացրել Չարչյանին ձերբակալելու մասին որոշման դեմ, ինչը բավարարվել է քվեարկության օրը և նա դատարանի որոշմամբ ազատ է արձակվել։

Հունիսի 21-ին դատախազությունը հաղորդագրություն տարածեց՝ նշելով, որ ԿԸՀ-ն բավարարել է Արմեն Չարչյանի նկատմամբ հետապնդում իրականացնելու և նրան ազատությունից զրկելու համաձայնություն տալու վերաբերյալ միջնորդությունները։ ԿԸՀ համաձայնությունը ստանալուց հետո ՀՔԾ-ն մեղադրանք է առաջադրել Արմեն Չարչյանին՝ ՀՀ քրեական օրենսգրքի 154.2-րդ հոդվածի 4-րդ մասի 2-դ կետի հատկանիշներով և նրա նկատմամբ կալանավորումը որպես խափանման միջոց ընտրելու մասին միջնորդություն ներկայացրել դատարան, որը մասամբ բավարարվել էր դատավոր Արմինե Մելիքսեթյանի կողմից։ Այժմ քրեական գործը գտնվում է Երևանի ընդհանուր իրավասության դատարանի դատավոր Վահե Միսակյանի վարույթում։

Հեղինակ՝ Իզաբել Սահակյան

Աղբյուր` Փաստինֆո