Փաստ ինֆո

Այսօրվա իշխանությունները հետապնդումներ են իրականացնում այն ուժերի նկատմամբ, որոնք հակադրվում են այս կառավարման համակարգին։ Այս մասին հրատապ մամուլի ասուլիսին ասաց խմբակցության ղեկավար Սեյրան Օհանյանը։

Նրա փոխանցմամբ՝ այսօր տեղի է ունեցել «Հայաստան» խմբակցության հերթական նիստը, որին ներկա էր նաև դաշինքի առաջնորդ, ՀՀ երկրորդ նախագահ Ռոբերտ Քոչարյանը, որի ընթացքում տեղեկացել են, որ Վերաքննիչ քրեական դատարանը Չարչյանին կալանավորելու որոշում է կայացրել։

Օհանյանն ընդգծեց, որ այսօրվա իշխանությունները, հատկապես՝ դատական համակարգը հերթական խայտառակ մոտեցումը ցուցաբերեցին ընդդիմադիր ուժերի, «Հայաստան» խմբակցության մեր գործընկերոջ նկատմամբ՝ հանձինս Արմեն Չարչյանի։

Նրա դիտարկմամբ՝ Արմեն Չարչյանը ՀՀ-ում գոյություն ունեցող օրենսդրական դաշտի շրջանակներում ընտրվել է որպես պատգամավոր և պարտավոր է իր պատգամավորական գործունեությունը ծավալել «Հայաստան» խմբակցության շրջանակներում։

«Այս ժամանակահատվածում նա պատշաճ վերաբերմունք է ցուցաբերել պատգամավորական իր պարտականություններին, որևէ խախտում նրա վարքագծում տեղի չի ունեցել և սա ևս մեկ անգամ ցույց է տալիս, որ այսօրվա իշխանությունները հետապնդումներ են իրականացնում այն ուժերի նկատմամբ, որոնք հակադրվում են այս կառավարման համակարգին»,- նշեց Օհանյանը՝ հավելելով, որ Արմեն Չարչյանը պետք է ազատ արձակվի։ Օհանյանը վստահեցրեց, որ «Հայաստան» դաշինքի գործունեության ընթացքում համապատասխան վերաբերմունք լինելու է այսօրվա իշխանությունների նկատմամբ։

Աղբյուր` Փաստինֆո