Փաստ ինֆո

ՀՀ քննչական կոմիտեն արձագանքել է Կառավարական առանձնատների վերանորոգման ընթացքում բացահայտված չարաշահումների գործը «ջրելու», այն է՝ կարճելու մասին «Փաստինֆո»-ի հրապարակմանը։

«Քաղաքական կոռուպցիա. կառավարական առանձնատների վերանորոգման ընթացքում ՊՎԾ-ի հայտնաբերած չարաշահումները քննչականը «ջրել» է». գործը կարճվել է» վերտառությամբ օգոստոսի 20-ին հրապարակված նյութում «Փաստինֆո»--ն տեղեկացրել էր, որ «Կոնդի առանձնատների տնտեսություն» ՊՈԱԿ-ում պետական վերահսկողության ծառայության բացահայտած չարաշահումների առթիվ հարուցված գործը կարճվել է

Հիշեցնենք, որ մեկ տարի առաջ՝ 2020թ օգոստոսին ՊՎԾ-ն «Փաստինֆո»-ի հարցմանն ի պատասխան հաստատել էր, որ «Կոնդի առանձնատների տնտեսություն» ՊՈԱԿ-ում, որի հաշվեկշռում են գտնվում նաև Նիկոլ Փաշինյանի ընտանիքին և մյուս բարձրաստիճան պաշտոնյաներին սպասարկող կառավարական առանձնատները, չարաշահումներ են հայտնաբերվել։ Փաստի առթիվ հարուցվել էր քրեական գործ՝ ՀՀ քրեական օրենսգրքի 179-րդ հոդվածի 3-րդ մասի 1-ին կետով և ՀՀ քրեական օրենսգրքի 308-րդ հոդվածի 1-ին մասով, որով նախաքննության կատարումը հանձնարարվել է ՀՀ ՔԿ ՀԿԳ քննության գլխավոր վարչությանը։ Ընդ որում, «Կոնդի առանձնատների տնտեսություն» ՊՈԱԿ-ը, որտեղ հայտնաբերվել էին չարաշահումները, գործում է վարչապետի աշխատակազմի անմիջական ենթակայության տակ, որի ղեկավարն այն ժամանակ Էդուարդ Աղաջանյանն էր, որին շատերն անվանում են «Դիջեյ Էդո»։ Բացի այդ՝ 2020 հունվարի 31-ին կառավարության կայքում հրապարակված պաշտոնական փաստաթղթի համաձայն, տնօրենի լիազորությունները այդ պահի դրությամբ կատարել է Արուսյակ Մանավազյանը։ Վերջինս Փաշինյանի թիմում է դեռ 2008 թվականից՝ նախ որպես «Հայկական ժամանակ» օրաթերթի հաշվապահ, իսկ 2018 թվականից նաեւ՝ «Քաղաքացիական պայմանագիր» կուսակցության գլխավոր հաշվապահ։ Վերանորոգման գնումն էլ իրականացվել է մեկ աղբյուրից, այսինքն՝ մրցույթ չի հայտարարվել եւ մրցույթով չի ընտրվել շահող ընկերությունը, իսկ վերջինիս համար,ըստ շրջանառվող տեղեկությունների, այսպես ասած, երաշխավորել է Աննա Հակոբյանի եղբայրը՝ ԱԺ պատգամավոր Հրաչյա Հակոբյանը։ Ասել է թե՝ կոռուպցիոն սկանդալում շոշափվում էին ոչ միայն Նիկոլ Փաշինյանին ամենամոտ կանգնած մարդկանց, այլ նաեւ ընտանիքի անդամների անուններն ու շահերը։

Քրեական գործի հարուցման մասին հայտնի դառնալուց շուրջ մեկ տարի անց «Փաստինֆո»-ն գրավոր հարցում էր ուղարկել՝ պարզելու, թե ինչ փուլում է գտնվում գործի քննությունը, սակայն ՔԿ-ից, հղում կատարելով նախաքննական գաղտնիքին, հրաժարվել էին պատասխան տրամադրելուց, սակայն մեզ հայտնի էր դարձել, որ քրեական գործը կարճվել է, ինչի մասին իրազեկել էինք վերոնշյալ հրապարակման մեջ։

ՀՀ ՔԿ-ից այսօր պաշտոնական պարզաբանում ենք ստացել, որով հաստատել են, որ քրեական գործի վարույթը կարճվել է, ընդ որում՝ հանցակազմի բացակայության հիմքով։

«Հարկ ենք համարում ընդգծել, որ հիշյալ հրապարակման համար հիմք հանդիսացող գործով ձեռնարկվել են ՀՀ քրեական դատավարության օրենսգրքով նախատեսված բոլոր միջոցառումները՝ գործի հանգամանքների բազմակողմանի, լրիվ ու օբյեկտիվ հետազոտման համար։

Մինչդատական վարույթում իրականացված մեծածավալ գործողությունների արդյունքներով պարզվել և հիմնավորվել է, որ բացակայում է առերևույթ հանցագործության հանցակազմը, ուստի 2021թ մայիսի 31-ին որոշում է կայացվել ՀՀ քրեական դատավարության օրենսգրքի 35-րդ հոդվածի 1-ին մասի 2-րդ կետի հիմքով գործի վարույթը կարճելու մասին (արարքի մեջ հանցակազմ չկա)։

Կայացված որոշման օրինականությունը ստուգվել է ՀՀ դատախազությունում»,- նշվում է Քննչական կոմիտեի պարզաբանման մեջ։

Ի դեպ, պարզաբանման բովանդակությունից պարզ է դառնում, որ քրեական գործը կարճելու մասին որոշում կայացվել է մայիսի 31-ին՝ դեռևս ՔԿ նախկին նախագահ Հայկ Գրիգորյանի պաշտոնավարման ժամանակ. Արգիշտի Քյարամյանը ՔԿ նախագահի պաշտոնում նշանակվել է հուլիսի 12-ին։

Աղբյուր` Փաստինֆո