Փաստ ինֆո

Այսօր ԱԺ-ում մարդու իրավունքների պաշտպանության հարցերով քննարկման ժամանակ ԼՀԿ նախկին պատգամավոր Անի Սամսոնյանը ներկայացրեց ոլորտային մի շարք խնդիրներ:

Առաջին խնդիրը, որին նա անդրադարձավ ռազմագերիների հարցն է, ըստ Սամսոնյանի, ռազմագերիների հարցի նկատմամբ հանրությունը վերջերս անտարբեր է դարձել.

«Ռազմագերիների հարցի մասին վերջին շրջանում հանրությունը չի հիշում, ես այլևս չեմ զգում հանրային այն ճնշումը, որը կար այս հարցի վերաբերյալ: Մենք ունենք այնպիսի իշխանություն, որ որքան մեծ է հանրային ճնշումը, հարցերն ավելի արագ են լուծվում խնդիրները:

Հանձնաժողովը պետք է մեծ ուշադրություն այս հարցի վրա սևեռի»,-ասաց Անի Սամսոնյանը:

Վերջինս անդրադարձավ նաև պատերազմի մասնակիցներից հոգեբանական ծառայություն մատուցելու վերականգնմանը օժանդակելու խնդրին: Նախկին պատգամավորն ընդգծեց, որ պատերազմից հետո ինքնասպանություն գործածների մեծ մասը պատերազմի մասնակիցներ են.

«Սա ցույց է տալիս, որ այս մարդիկ մենակ են մնացել իրենց հոգեբանական խնդիրների հետ, իսկ հոգեբանական խնդիրները երկարատև վտանգավորության հարցեր են, որոնք կարող են շատ այլ խնդիրներ ստեծել և հարված հասցնել առողջ հասարակություն ստեղծելու մեր ջանքերին»,-ասաց նա:

Անի Սամսոնյանն իր խոսքում անդրադարձավ նաև քրեակատարողական հիմնարկներում առկա խնդիրներին և ընդգծեց, որ մոնիտորինգային այցերն այս հաստատություններ պետք է վերականգնվեն.

«Այս հաստատության շահառուները խոցելի խմբեր են, նրանք ամենաշատն են վտանգված այն առումով, որ նրանց իրավունքները կարող են ոտնահարվել: Սրա վերաբերյալ շատ ահազանգեր կան, պետք է վերականգնել մոնիտորինգային այցերն այս հաստատություններ»,-ասաց Անի Սամսոնյանը:

Վերջինս նշեց ոլորտային ևս մեկ խնդիր՝ կորոնավիրուսի ազդեցությունը կրթության որակի վրա.

«Կան շատ ուսումնասիրություններ, որ համավարակը և սահմանփակումները շատ լուրջ ազդեցություն են ունեցել կրթության որակի վրա, սրա հետևանքները կարող են հետագայում ավելի ակնառու լինել և խնդիրներ ստեղծել»,-ասաց Անի Սամսոնյանը:

Աղբյուր` Փաստինֆո