Փաստ ինֆո

Գործ ունենք բացառապես քաղաքական հետապնդման հետ։ «Վարդաշեն» ՔԿՀ-ի մոտ լրագրողների հետ զրույցում ասաց «Իզմիրլյան» ԲԿ նախկին տնօրեն, «Հայաստան» խմբակցության պատգամավոր Արմեն Չարչյանի փաստաբան Էրիկ Ալեքսանյանը։

Փաստաբանի փոխանցմամբ՝ Արմեն Չարչյանին գրավի դիմաց ազատելու մասին որոշումը բեկանելու որևէ հիմք չկար։

«Ի սկզբանե, պարոն Չարչյանին կալանավորելու հիմքը եղել է այն, որ իբրև մնալով ազատության մեջ, վերջինս ազդեցություն կգործադրի դատավարության մասնակիցների վրա՝ ելնելով այն հանգամանքից, որ վերջինս հանդիսանում է «Իզմիրլյան» ԲԿ տնօրեն »,- նշեց Ալեքսանյանը՝ հավելելով, որ ներկայումս Չարչյանը չի հանդիսանում «Իզմիրլյան» ԲԿ տնօրեն, հետևաբար, նման ազդեցություն գործադրելու այն մտավախությունը, որն ի սկզբանե պետությունն ունեցել է, այլևս գոյություն չունի։

Ալեքսանյանի խոսքով՝ դատախազությունն ամեն գնով ցանկացել է ազատությունից զրկել, իսկ վարույթն իրականացնող մարմինը, պետությունը չի կարող կամայական գործողություններ կատարել, բոլոր գործողությունները պետք է լինեն դատավարական և հետապնդեմ դատավարական նպատակ, որն այս դեպքում չկա։

Փաստաբանի խոսքով՝ շարունակելու են պայքարն իրավական դաշտում։

«Այն, որ գործն ունի քաղաքական ենթատեքստ, չի նշանակում, որ մենք մեր իրավական պայքարը չենք շարունակելու։ Բնականաբար շարունակելու ենք և եթե պետությունը մտածում է, որ այսօր Արմեն Չարչյանին ազատությունից զրկելով հարցը կարող է համարել փակված, ապա չարաչար սխալվում են։ Միանշանակ մինչև վերջ պայքարելու ենք։ Պարոն Չարչյանը գտնվելու է ազատության մեջ, դա իրենց ճաշակով է, իրենց ճաշակով չէ, իրենց ցանկությունից է բխում, թե ոչ՝ կարևոր չէ, կարևորն այն է, որ արդարադատությունը վերականգնվելու է և պարոն Չարչյանը վաղ թե ուշ գտնվելու է ազատության մեջ, թող դա բոլորն իմանան »,- նշեց Ալեքսանյանը ։

Աղբյուր` Փաստինֆո