Փաստ ինֆո

«Ֆիզգորոդոկ» թաղամասի բնակիչներն ավարտեցին հանդիպումը Երևանի քաղաքապետարանի ներկայացուցիչների հետ։ 

Թաղամասի բնակիչ Հայկ Հարությունյանը լրագրողների հետ զրույցի ժամանակ ասաց, որ արդյունավետ և կառուցողական քննարկում են ունեցել, ինչի արդյունքը ժամանակը ցույց կտա։

«Հանդիպեցինք քաղաքապետի խորհրդականի, ավագանու անդամի հետ և քաղաքապետարանի որոշ աշխատակիցների հետ։ Թաղամասից ներկա էր 3 բնակիչ, այդ թվում նաև մեր փաստաբանը։ Ներկայացրեցինք իրավական բոլոր խնդիրները, հարցադրումները։ Կառուցապատողին առաջարկվելու է, որ 2 օրով կասեցնի շինարարությունը, որ քաղաքապետարանի ներսում տեղի ունենան ավելի մանրամասն քննարկումներ, ուսումնասիրվի հարցը և այդ ուղղությամբ լուծումներ փնտրեն»,-նշեց Հայկ Հարությունյանը։

Նրա խոսքով հնարավոր է 2 օր հետո կրկին հանդիպում լինի։ Բնակիչները հանդիպման ժամանակ ընդգծել են, որ ժամանակին ապօրինի կերպով է ձեռք բերվել սեփականության իրավունք այդ հողամասի նկատմամբ։

«Ավելի շատ կենտրոնացել ենք հարցի իրավական կողմի վրա, որովհետև եթե պարզվի, որ կառուցապատողը դրա նկատմամբ հիմնավոր իրավունքներ չունի և դրանք վիճելի են ու անհրաժեշտ է հողը վերադարձնել պետությանը, ապա մնացած հարցերն արդեն քննարկման ենթակա չեն»,-նշեց Հայկ Հարությունյանը։

Նշենք, որ բնակիչները տևական ժամանակ է, ինչ պայքարում են կանաչ գոտում նախատեսվող ապօրինի կառուցապատման դեմ։

Բնակիչների խոսքով նախատեսվող 12-հարկանի բարձրահարկ շենքի կառուցման պայմաններում խախտվելու է իրենց առողջ կենսագործունեության պայմաններում ապրելու իրավունքը։

Ալիխանյան եղբայրներ 6/1 հասցեի հողամասը բնակիչների խոսքով սեփականաշնորհվել է 2005 թվականին ոչ իրավաչափ եղանակով։

Աղբյուր` Փաստինֆո