Փաստ ինֆո

Բանակը կազմալուծում եք, լավագույն հրամանատարներին տուն ուղարկում, հետո՝ հայտարարում բանակի բարեփոխման-վերափոխման մասին։ Իսկ մինչ այդ՝ թեժ կամ՝ հատուկ թեժացված հատվածներում  զինվորներ են սպանվում անհասկանալի հանգամանքներում։ Երեք զինվոր՝ նույն մարտական հենակետում։ Սա ի՞նչ է՝ եթե ոչ՝ ամենաթողություն, եթե ոչ՝ անկառավարելիություն։ Տպավորություն է, որ  Հայաստանում հայ զինվորը, նորակոչիկը, սահման պահողը այլևս բարձր ու թանկ արժեք չեն։ Պայմաններն,  ուր ապրում են մեր զինվորները, արդեն իսկ փաստ են։  Այս թարմ կատարվածի հետևանքները, հանգամանքները․․․պարզեք-չպարզեք՝ տեսանելին ու ակնառուն պարզ են․․․

Ծրագիր եք ներկայացնում՝ արտաքին հետախուզություն ստեղծելու խնդիր դնում։ Բնականաբար, նոր բան չեք հորինել, այդ ծառայությունը բոլոր նախորդ ժամանակներում եղել է, այլ խնդիր, թե ինչպե՞ս է եղել, որքանո՞վ է կարողացել երկիրը զերծ պահել օտարերկրյա գործակալներից։ Ցավոք, նախորդ շրջանների գործունեության գնահատականն էլ՝ ձեր   հակահայ իշխանության «հեղափոխական» հայտնությունն է։

Պատրանքաթափ եղեք, վերջապես, քանզի ոլորտ չկա, որ չեք տապալել։ Չպատճառաբանված «ռակիռովկաները»՝ ի սկզբանե չպատճառաբանված նշանակումների շրջանակում դեռ չի նշանակում, որ գործ եք անում։ Ասֆալտ փռելը դեռ չի նշանակում, թե ճանապարհ եք կառուցում։ Անցած երեք տարիների ընթացքում միայն ասֆալտ եք փռել կամ ասֆալտին եք փռել։ Հատկապես վերջինը և հատկապես՝ հայտարարությունների ու սպառնալիքների  մակարդակում։

Պարզ է, դրսում էլ, ներսում էլ տեսանելի է,  որ կադրեր չկան, չկա, չունեք, այլապես ԱԽՔ-ը չէր դառնա ԱԳՆ տեղակալ-տեղապահ ու հետո նորից չէր վերադառնա ելման դիրք, այլապես որպես թշնամի պետության գործակալ, ապա նաև՝ կրկնակի գործակալ դարձած  նախկին ԱԺ նախագահը չէր նշանակվի կարևորագույն՝ արտգործնախարարի  պաշտոնին։ Մարդ, որի անունը կապվում է թշնամի պետության հետ։ 

Ի դեպ, չեղած ու չլինելիք ձեր «բարեփոխումների» հերթականությունն արդեն իսկ խոսուն է։ Գեոպոլիտիկայից, արտաքին մարտահրավերները հասկանալուց, երկրի սահմանները պաշտպանելու և անվտանգային խնդիրները լուծելու գիտակցությունից /ձեր սահմանն անսահմանն է, չէ՞/ մղոններով հեռու լինելու համար հպարտ՝  միշտ ու միայն ընտրությունների վրա եք կենտրոնացել։ Իսկ դրա համար նախ՝ ներքին, ոստիկանական ցանցը պիտի լիներ, որ եռաշարք ու քառաշարք պատ կազմեր բոլոր հնարավոր ուղղություններով և շենքերի ներսուդրսում, բայց՝ ամենակարևորը՝  սեփական թիկունքը ամրացնելու համար։

Ձեր պարեկապահակային «բարեփոխումը» միայն աժիոտաժ և աղմուկ է առաջացնում, խճողում է երթևեկությունը՝ բանուկ հատվածներում։ Դրա նպատակը բացառապես իշխանության համար ճանապարհ հարթելն է, բայց՝ ոչ միայն։

Արտաքին հետախուզություն եք ստեղծում՝ Հայաստանը աշխարհի բոլոր երկրների լրտեսական ցանց դարձնելուց, լրտեսներին արտաքին ճակատ, կարևոր դեսպանություններ  գործուղելուց  հետո․․․ Ճիշտ ժամանակն է։ Բայց մինչ այդ՝ արդեն մեկ տարին լրանում է, իսկ   «բոլորը բոլորի դիմաց» կետով հայ   ռազմագերիների հարցի լուծումը չի երևում, փոխարենը՝ գերիների ծնողներին հիմա էլ՝ կառավարությունից  ԱԱԾ եք ուղարկում։ Դե, իհարկե, պատասխանատվությունից խուսափելու ամենակարճ ճանապարհն է, մանավանդ՝ ասելիք չկա, բոլոր ժամկետներն ու ստերը սպառվում են մի օր։

Ի դեպ, հավանականությունը մեծ է, որ  արտաքին հետախուզությունը ձեր պարագայում ներքին է լինելու։ Իսկ  բանակի «բարեփոխումներից» ավելի լավ է չխոսեք, լռեք։

Երեք սպանված մեկ հենակետում և նույն օրում։ Ահավոր է։

Հեղինակ՝ Ա․Ե․

Աղբյուր` Փաստինֆո