Փաստ ինֆո

Բարդ է կռահել, թե ինչով էր պայմանավորված ճանապարհների ապաշրջափակման հարցով բանակցությունների դադարեցումը, իսկ հիմա կրկին վերսկսումը։ Սակայն ակնհայտ է, որ ռուսական կողմի ազդեցությունն այս բանակցությունների վրա էական մեծ է։ «Փաստինֆո»-ի հետ զրույցում ասաց Ադրբեջանի հարցերով փորձագետ Գառնիկ Դավթյանը։

Նրա դիտարկմամբ՝ ենթադրվում է, որ հայկական կողմն ընդունել է այն իրավիճակը, որն ունենք և փորձում է եռակողմ բանակցությունների միջոցով որևէ լուծում գտնել։

«Ադրբեջանը միշտ որևէ պայմանավորվածության հիմքում առաջին հերթին սեփական շահն է տեսնում և դրանք խախտելը, քան բանակցությունների միջոցով ինչ-որ կոմպրոմիսային լուծման հասնելը։ Հետևաբար այս բանակցությունների վերսկսումը վկայում է այն մասին, որ հայկական կողմը բանակցությունների մասով բավական թույլ է։ Այսինքն` թելադրող կողմն Ադրբեջանն է»,-նշեց փորձագետը։

Գառնիկ Դավթյանը կարծում է, որ պատերազմից հետո պետական ապարատն ինքն իր համար է աշխատում և հանրությանը սպառիչ պատասխաններ չի ներկայացնում, թե կոնկրետ ինչի շուրջ են բանակցում։ Փորձագետը նկատում է՝ ոչ ոք չգիտի, թե իշխանությունն ինչի շուրջ է բանակցում և ուր է տանում ՀՀ-ն։

«Ելնելով նախկին դառը փորձից, կարելի է մտածել, որ հերթական կապիտուլյացիոն փաստաթղթի շուրջ են բանակցություններն ընթանում։ Որևէ դրական ազդակ չեմ տեսնում, որ այս իշխանություններն անեն։ Մի բան ասում են, դրա հակառակն անում»,-նշեց Գառնիկ Դավթյանը։

Նրա կարծիքով՝ Ադրբեջանը վերջին սահմանային լարումներով մի քանի նպատակ է հետապնդում, որոնցից մեկը սահմանագծում և սահմանազատում իրականացնելն է, իսկ մյուսը՝ ստիպել հայերին, որ բանակ չունենան, քանի որ հստակ գիտակցում կա՝ եթե մի օր համախմբված լինենք և զինվորական ներուժը վերակառուցենք, ապա ռևանշի կգնանք։

«Ադրբեջանի կողմից տարվող քաղաքականության տրամաբանության հիմքում Հարավային Կովկասի հայաթափումն է։ Նրանք միշտ հայերին դիտարկում են որպես մանրադրամ։ Երբ պետք է հայերին օգտագործում են սեփական շահերի համար, երբ պետք չէ, հայերին ոչնչացնելու կոչեր են անում»,-նշեց փորձագետը։

Վերջինս ընդգծեց՝ այսօր ավելի շատ հայկական կողմն է խաղաղության քարոզ տանում, քան Ադրբեջանը, ինչը տրամաբանությունից զուրկ է, քանի որ երկրորդ ցեղասպանության կրկնման հիմք կա։

«Եթե չես գիտակցում՝ քո թշնամին ով է և անընդհատ խոսում ես խաղաղությունից ու հիմքում տեսնում միակողմանի զիջումներ, ապա նշանակում է՝ հայկական կողմից չկա գիտակցություն, թե ինչ մեծ վտանգներ է պարունակում ադրբեջանական կողմի քարոզչությունը»,-հավելեց Գառնիկ Դավթյանը։

Աղբյուր` Փաստինֆո