Փաստ ինֆո

Թուրքիան և Ադրբեջանը, օգտագործելով ապաշրջափակման գաղափարը, Հայաստանը տանում են դեպի մասնատում.Այս պահին բոլոր միջպետականև միջկառավարական քննարկումներն, ըստ իս, միտված են սահմանին առկա լարվածությունը նվազեցնելուն: Ռուսաստանին բնավ ձեռնտու չէ ներքաշվել նոր պատերազմական իրավիճակների մեջ, նա փորձում է եռակողմ աշխատանքային խմբի միջոցով վերահսկել տեղի ունեցող գործընթացները: «Փաստինֆո»-ի հետ զրույցում ասաց ԲՀԿ-ական նախկին պատգամավոր Արման Աբովյանը:

Ավելի վաղ հայտնել էինք, որ Ռուսաստանը, Հայաստանը և Ադրբեջանը Մոսկվայում վերսկսել են Ղարաբաղի հարցով եռակողմ աշխատանքային խմբի աշխատանքը, երեքշաբթի կայացած նիստում ներկայացուցիչները քննարկել են Հարավային Կովկասի տարածաշրջանում տրանսպորտային հաղորդակցությունների վերականգնման հեռանկարները եւ երեք երկրների ղեկավարների պայմանավորվածությունների կատարման ընթացքը:

Արման Աբովյանն ընդգծեց, որ աշխատանքային խումբը հիմնականում զբաղվում է ճանապարհների ապաշրջափակման հարցով, ինչն այս պահի դրությամբ ձեռնտու չէ հայկական կողմին.

«Թուրքիան և Ադրբեջանը բազմաթիվ անգամ հայտարարել են, որ իրենք դա չեն դիտարկում որպես տարածաշրջանի ապաշրջափակում կամ որոշակի տնտեսական գործողություններ, այլ գնահատում են իրենց զավթողական և Հայաստանի մասնատման ծրագրի ընդամենն առաջին փուլ: Սրա մասին նաև անթաքույց հայտարարել էր Ալիևը, երբ ասել էր, որ իրենց նպատակը փուլային է: Ամենազավեշտալին այն է, որ քոչվոր ցեղը կարծիք է արտահայտում, թե իրենք պետք է վերադառնան իրենց «պապական հողեր», այն պարագայում, երբ իրենք մեզանից շատ լավ գիտեն, որ քոչվոր են»,-ասաց Աբովյանը և ընդգծեց, որ Թուրքիան և Ադրբեջանը, օգտագործելով ապաշրջափակման գաղափարը, Հայաստանը տանում են դեպի մասնատում.

«Ռուսաստանը սա շատ լավ հասկանում է, ինչպես տեսնում եմ, նրա նպատակն այս պարագայում ընդամենը լարվածության նվազումն է, բայց սա էլ արդեն արդյունավետ չէ, սա էլ է ռուսական կողմը հասկանում, այստեղ պարզապես նյարդերի պայքար է և ժամանակի ձգում: Ռուսները ցանկանում են բոլոր գործընթացներն իրենց վերահսկողության տակ պահել, քանզի հասկանում են, որ Հայաստանի մասնատումը հետագայում սպառնալիք է դառնալու Հյուսիսային Կովկասին: Այստեղ խնդիրն այն է, թե որքանո՞վ են վճռական Հայաստանի իշխանությունները, նրանք պետք է ձերբազատվեն վարդագույն երազանքներից, սթափ գնահատեն իրավիճակը և պարզապես պայմաններ դնեն՝ եթե եռակողմ համաձայնագրի կետերը չկատարվեն, ճանապարհների ապաշրջափակման մասին խոսք լինել չի կարող»,-ասաց Աբովյանը:

Վերջինիս դիտակմամբ՝ ռուսական կողմին ձեռնտու չէ ճանապարհների ապաշրջափակումն այն ֆորմատով, որն այսօր ձևավորվել է տարածաշրջանում, նա փորձում է վերահսկել գործընթացները և փորձում է խուսափել լայնամասշտաբ պատերազմից.

«Ռուսաստանի համար կարևոր չէ, թե ով է Հայաստանում իշխանության, նրանց համար կարևոր է, որ հայկական գործոնը չթուլանա և դուրս չմղվի, որովհետև որքան թուլանում է հայկական գործոնը, այնքան թուլանում է ռուսական գործոնը, դրա հետ մեկտեղ անկայունությունը տեղափոխվում է Հյուսիսային Կովկաս»,-ասաց Աբովյանը:

Զրուցակիցը նաև արձանագրեց, որ Ադրբեջանը, սահմանային միջադեպեր հրահրելով, շանտաժի է ենթարկում ոչ միայն Հայաստանին, այլ՝ Ռուսաստանին.

«Նրանք Ռուսաստանին ասում են՝ եթե չեք համաձայնվում խաղաղ պայմաններում Հայաստանի մասնատմանը, ապա իրենք պատրաստ են մասնատել՝ ռազմական ներուժն օգտագործելով, իսկ Ռուսաստանն այս պարագայում ժամանակ է ձգում»,-ասաց նա:

Իսկ թե ինչո՞ւ սահմանային լարվածության ֆոնին հայկական կողմը համաձայնվեց մասնակցել եռակողմ աշխատանքային խմբի աշխատանքներին, Աբովյանն ասաց.

«Գործող իշխանությունն ապրում է վարդագույն վտանգավոր երազանքների մեջ և խաղում է Հայաստանի ինքնիշխանության, տարածքային ամբողջականության և հայ ժողովրդի անվտանգություն, դժվար է ասել՝ հասկանալո՞վ են անում, թե՞՝ չհասկանալով, քանի որ իրենց մոտ սուրբ համոզմունք կա, որ իրենք ամեն ինչ ճիշտ են անում և համոզված են իրենց ճշմարտության մեջ»,-ասաց Աբովյանը։

Աղբյուր` Փաստինֆո