Փաստ ինֆո

Վերաքննիչ քրեական դատարանում՝ դատավոր Սևակ Համբարձումյանի նախագահությամբ, այսօր կայացել է  «Իզմիրլյան» ԲԿ նախկին տնօրեն, «Հայաստան» խմբակցության պատգամավոր Արմեն Չարչյանին գրավի դիմաց ազատ արձակելու որոշման դեմ դատախազության բողոքի քննությունը։

Ինչպես արդեն տեղեկացրել ենք՝ Երևանի ընդհանուր իրավասության դատարանը՝ դատավոր Վահե Միսակյանի նախագահությամբ, գործի՝ դատաքննության նախապատրաստման փուլում քննարկել է Չարչյանի խափանման միջոցի հարցը և հուլիսի 21-ին նրան կալանքից ազատել՝ բավարարելով Արմեն Չարչյանին գրավի դիմաց ազատ արձակելու մասին պաշտպանների միջնորդությունը՝ գրավի չափ սահմանելով 15 մլն ՀՀ դրամը։ Մեղադրող դատախազ Ազատ Մարգարյանը վերաքննիչ բողոք է ներկայացրել՝ պահանջելով բեկանել Արմեն Չարչյանի նկատմամբ ընտրված խափանման միջոց կալանավորումը գրավով փոխարինելու մասին դատարանի որոշումը, իսկ Չարչյանի նկատմամբ նախկինում ընտրված խափանման միջոց կալանավորումը համարել հիմնավորված և թողնել անփոփոխ։

Վերաքննիչ քրեական դատարանում բողոքի քննության ընթացքում բողոքաբեր կողմը՝ մեղադրող դատախազն արձանագրել է, որ խոսքը գնում է ծանր հանցագործության մասին, իսկ Արմեն Չարչյանի կողմից գործի քննությանը հնարավոր խոչընդոտելու ռիսկը չի նվազել, ուստի գտնում է, որ Չարչյանի նկատմամբ որպես խափանման միջոց պետք է կիրառվի կալանավորումը։

 Մեղադրող դատախազ Ազատ Մարգարյանի կարծիքով՝ առաջին ատյանի դատարանի որոշումն անհիմն է և չի բխում Քրեական դատավարության օրենսգրքից, ինչը, ըստ դատախազի, պետք է արձանագրվի նաև Վերաքննիչ քրեական դատարանի կողմից, ինչի հետևանքը կլինի առաջին ատյանի դատարանի որոշման բեկանումը։  Փաստաբան Էրիկ Ալեքսանյանը, ներկայացնելով առարկությունները, նշեց, որ  նախաքննության ընթացքում սահմանվում էր գործի քննությանը խոչընդոտելու ռիսկը՝ վկաների վրա ազդեցություն գործադրելու տեսանկյունից, սակայն այժմ վկաներն արդեն իսկ ցանկալի ցուցմունքներ են տվել, հետևաբար, նրանց վրա ազդեցություն գործադրելու տրամաբանություն չկա։ Բացի այդ՝ առաջին ատյանի դատարանում՝ դատաքննության նախապատրաստման փուլում Արմեն Չարչյանի խափանման միջոցի քննության պահին Չարչյանն այլևս չէր հանդիսանում «Իզմիրլյան» ԲԿ տնօրեն, հետևաբար, իր կարգավիճակից ելնելով հնարավորություն այլևս չուներ խոչընդոտելու, իսկ այն, որ Արմեն Չարչյանն ունի հեղինակություն, դա պետք է գնահատվի դրական իմաստով, ոչ թե՝ բացասական։

Ալեքսանյանը դատարանի ուշադրությունը հրավիրեց այն հանգամանքի վրա, որ քրեական գործում առկա է տեսաձայնագրություն և ձայնագրություն և մեղադրանքի կողմի պնդմամբ՝ վկաների ցուցմունքները որևէ էական նշանակություն չունեն, հետևաբար՝ ինչքանո՞վ է իրատեսական նպատակային այս կամ այն վկայի վրա ազդեցություն գործադրել, եթե ամբողջ խոսակցությունն արտացոլված է և Չարչյանի բոլոր խոսքերը լսվում են։ Ինչ վերաբերում է հանրային վտանգավորությանը, ապա ՄԻԵԴ-ն հստակ արձանագրել է, որ մեղսագրվող հանցանքի ծանրության աստիճանը հիմք չէ, դա տարր է, որը պետք է գնահատվի հիմքերի հետ համատեքստում։ Բացի այդ՝ Ալեքսանյանն արձանագրեց, որ պատգամավորը չի կարող ազատազրկվել՝ առանց ԱԺ համաձայնության։ Ալեքսանյանը գտնում է, որ Երևանի ընդհանուր իրավասության դատարանի որոշումը հիմնավոր է, դատախազի բողոքն անհիմն է և ենթակա է մերժման։

Դատական նիստը հետաձգվեց՝ մինչև օգոստոսի 20-ը։

Հիշեցնենք, որ տելեգրամյան մի ալիքում հրապարակվել էր ձայնագրություն, համաձայն որի՝ «Իզմիրլյան» բժշկական կենտրոնի տնօրեն Արմեն Չարչյանը հունիսի 18-ի առավոտյան աշխատակիցների հետ հանդիպմանը հորդորել է, որ աշխատակիցները պարտադիր կարգով մասնակցեն ընտրություններին։ Չարչյանը նշել է, որ եթե որևէ մեկը չմասնակցի ընտրություններին, ապա կիմանա այդ մասին։

Ձայնագրության հրապարակումից հետո հաշված ժամերի ընթացքում ՀՔԾ-ում հարուցվել է քրեական գործ՝ ՀՀ քրեական օրենսգրքի 154.2-րդ հոդվածի 4-րդ մասի 2-դ կետի հատկանիշներով, որի շրջանակներում նախ բերման են ենթարկել Չարչյանին և տեղափոխել ՀՔԾ, ապա ձերբակալելու որոշում կայացրել։

Պաշտպանները բողոք են ներկայացրել Չարչյանին ձերբակալելու մասին որոշման դեմ, ինչը բավարարվել է քվեարկության օրը և նա դատարանի որոշմամբ ազատ է արձակվել։

Հունիսի 21-ին դատախազությունը հաղորդագրություն տարածեց՝ նշելով, որ ԿԸՀ-ն բավարարել է Արմեն Չարչյանի նկատմամբ հետապնդում իրականացնելու և նրան ազատությունից զրկելու համաձայնություն տալու վերաբերյալ միջնորդությունները։ ԿԸՀ համաձայնությունը ստանալուց հետո ՀՔԾ-ն մեղադրանք է առաջադրել Արմեն Չարչյանին՝ ՀՀ քրեական օրենսգրքի 154.2-րդ հոդվածի 4-րդ մասի 2-դ կետի հատկանիշներով և նրա նկատմամբ կալանավորումը որպես խափանման միջոց ընտրելու մասին միջնորդություն ներկայացրել դատարան, որը մասամբ բավարարվել էր դատավոր Արմինե Մելիքսեթյանի կողմից։ Քրեական գործով նախաքննությունն ավարտվել է եւ գտնվում է Երևանի ընդհանուր իրավասության դատարանի դատավոր Վահե Միսակյանի վարույթում, որն էլ գրավը թույլատրելի էր համարել այս փուլում։

Հեղինակ՝ Իզաբել Սահակյան

Աղբյուր` Փաստինֆո