Փաստ ինֆո

Երեկ երեկոյան հաստատվեց տելեգրամյան ալիքներով տարածված տեղեկատվությունը, որ վերսկսվել են Հայաստանի, Ադրբեջանի և Ռուսաստանի փոխվարչապետերի գլխավորությամբ գործող եռակողմ աշխատանքային խմբի աշխատանքները: Լուրն անակնկալ չէր, քանի որ վարչապետ Փաշինյանը կառավարության  օգոստոսի 12-ի նիստի ժամանակ հայտարարել էր, որ օր առաջ պետք է վերսկսվի աշխատանքը՝ փոխվարչապետների եռակողմ ձևաչափում։

Տարակուսելին այդ աշխատանքների վերսկսման ժամանակն է և իրադրությունը հայ-ադրբեջանական սահմանին: Նշենք, որ  վերջին անգամ նման ձևաչափով հանդիպում տեղի էր ունեցել  գարնանը՝ ապրիլին, սակայն մայիսի 12-ից հետո, երբ Ադրբեջանը ներխուժեց ՀՀ սուվերեն տարածք՝  Սյունիք և Գեղարքունիք, հանդիպումների շարքը կասեցվեց։ ՀՀ փոխվարչապետ Մհեր Գրիգորյանը հայտարարել էր, որ նման պայմաններում հանդիպումները շարունակելը արդյունավետ լինել չի կարող։ «Ես բազմիցս հայտարարել եմ, որ այդ աշխատանքներն արդյունավետ կլինեն, եթե ընդհանուր իրավիճակը լինի առնվազն կայուն։ Իսկ այս իրավիճակում, այսինքն` սահմանին տիրող լարվածության ֆոնին, չեմ կարծում, որ կառուցողական կլինի շարունակել այդ աշխատանքները»,– «Փաստինֆո»-ի հաղորդմամբ՝ հունիսի 1-ին ասել է  Գրիգորյանը։

Անցած ամիսների ընթացքում իրավիճակի ոչ միայն չի կարգավորվել, ադրբեջանցիները ոչ միայն չեն հեռացել ՀՀ սուվերեն տարածքից, այլ շարունակում է իր ագրեսիան թիրախավորելով  ՀՀ բնակավայրերը։ ՀՀ ՊՆ-ի հայտարարությունների համաձայն՝ միայն վերջին մեկ շաբաթվա ընթացքում հակառակորդը փորձել է առաջանալ թե Սեւ լճի հատվածում, թե սադրանքների դիմել Երասխում եւ Գեղարքունիքում, որի հետեւանքով ունենք զոհեր ու վիրավորներ։ Ավելին՝ պաշտոնական Բաքուն առավել կոշտացրել է իր հռետորաբանությունը՝ նշելով, որ չեն հեռանալու ներկայումս զբաղեցրած իրենց դիրքերից, ադրբեջանական ԶԼՄ-ներին կոչ արել ՀՀ բնակավայրերի մասին խոսելիս նշել դրանց ադրբեջանական անվանումները։ Իսկ CNN Turk-ին տված հարցազրույցում  Ալիեւը կրկին խոսել է, այսպես կոչված «Զանգեզուրի միջանցքի» մասին, ինչին այս անգամ որևէ մակարդակով պատասխան չեղավ Հայաստանից:

Ասել է թե՝ սահմանին տիրող լարվածությունը նոր թափ է հավաքել ու հանկարծ դա այլեւս սկսեց չխանգարել ՀՀ իշխանություններին՝ մասնակցել եռակողմ հանդիպումներին։

Արդյո՞ք սա նշանակում է, որ հայկական կողմն արդեն համաձայնել է տրամադրել այդ միջանցքը և, ըստ էության, վտանգել Սյունիքի գոյությունը, տրամադրել Տավուշի անկլավները՝ վտանգել հայ-վրացական սահմանը։

Այլ խոսքով՝ իշխանությունները մտածված թե տկարամտության արդյունքում Հայաստանը կամաց-կամաց  դարձնում են անկլավ։

Աղբյուր` Փաստինֆո