Փաստ ինֆո

Երևանի ընդհանուր իրավասության դատարանի դատավոր Կարեն Ֆարխոյանը կշարունակի քննել Գորիսի քաղաքապետի տեղակալ Իրինա Յոլյանի խափանման միջոցի հարցը։ «Փաստինֆո»-ի թղթակցի հաղորդմամբ՝ Երևանի ընդհանուր իրավասության դատարանը՝ դատավոր Կարեն Ֆարխոյանի նախագահությամբ, քիչ առաջ մերժել է ինքնաբացարկ հայտնելու մասին Իրինա Յոլյանի պաշտպանի միջնորդությունը, իսկ որոշման հրապարակումից հետո դատական նիստը հետաձգվել է մինչև ժամը 18։30-ը։

Այս պահին դատավոր Մնացական Մարտիրոսյանը  շարունակում է  Գորիսի փոխքաղաքապետ Մենուա Հովսեփյանի նկատմամբ կալանավորումը որպես խափանման միջոց ընտրելու մասին միջնորդության քննությունը, ինչից հետեւում է, որ  ինքնաբացարկի միջնորդությունը մերժվել է։

Նշենք, որ պաշտպաններն ինքնաբացարկի  միջնորդություններ են ներկայացրել դատավորներին՝ կասկածի տակ դնելով մակագրման գործընթացի օրինականությունը։

Հիշեցնենք, որ  օգոստոսի 16-ին ՀՀ ՔԿ-ն որոշումներ է կայացրել Գորիս համայնքի ղեկավարի պաշտոնակատար Իրինա Յոլյանին, համայնքապետարանի երկու աշխատակիցներին ՀՀ քրեական օրենսգրքի 179-րդ հոդվածի 3-րդ մասի 1-ին կետով, իսկ համայնքի ղեկավարի տեղակալ Մենուա Հովսեփյանին՝ ՀՀ քրեական օրենսգրքի 149.1-րդ հոդվածի 2-րդ մասի 1-ին և 2-րդ կետերով, 179-րդ հոդվածի 3-րդ մասի 1-ին և 179-րդ հոդվածի 2-րդ մասի 1-ին կետերով նախատեսված հանցավոր արարքներ կատարելու համար որպես մեղադրյալներ ներգրավելու մասին: Նրանք ձերբակալվել են երեկ՝ նրանց նկատմամբ որպես խափանման միջոց կալանավորումն ընտրելու միջնորդության քննության նպատակով դատարան ներկայացվելու համար։ Քրեական գործը, որի շրջանակներում Գորիսի համայնքապետի տեղակալներ Իրինա Յոլյանը և Մենուա Հովսեփյանը, ինչպես նաև՝ համայնքապետարանի երկու աշխատակիցներ ներգրավել են որպես մեղադրյալ, վերաբերում է Գորիսի համայնքապետ Առուշ Առուշանյանի և Քարահունջ բնակավայրի ղեկավար Լուսինե Ավետյանի քրեական գործի անջատված մասին։

Հեղինակ՝ Իզաբել Սահակյան

Աղբյուր` Փաստինֆո