Փաստ ինֆո

Եթե դատարանը տեսնում է խնդիր՝ սահմանադրականության հետ կապված, ունի սահմանադրական պարտականություն՝ դիմելու ՍԴ՝ այդ կասկածները փարատելու տեսանկյունից։ Այս մասին լրագրողների հետ զրույցում ասաց Արմեն Գևորգյանի փաստաբան Էրիկ Ալեքսանյանը։

Ինչպես արդեն տեղեկացրել ենք՝ ՀՀ երկրորդ նախագահ Ռոբերտ Քոչարյանի և Արմեն Գևորգյանի գործով այսօր պաշտպան Էրիկ Ալեքսանյանը միջնորդություն էր ներկայացրել դատարան՝ Արմեն Գևորգյանի անձեռնմխելիության հաղթահարման վերաբերյալ օրենսդրական բացի հարցով ՍԴ դիմելու մասին, որի քննությունը հետաձգվել է։

Ալեքսանյանը լրագրողների հետ զրույցում պարզաբանեց, որ դատաքննության այս փուլում չկա այն սուբյեկտը, որը պետք է դիմի անձեռնմխելիությունը հաղթահարելու և ազատությունից զրկելու թույլտվություն ստանալու համար և օրենսդրական բացի պայմաններում հարցը կարող է լուծել ՍԴ-ն։ Ինչ վերաբերում է ՍԴ-ի կողմից խնդիրն արձանագրելուն հաջորդող գործընթացներին, փաստաբանը նշեց, որ պետք է համապատասխան փոփոխություն կատարվի։

«Եթե ՍԴ-ն համապատասխան լուծումը տալիս է, ասում է, որ կա խնդիր, որ քրեական հետապնդում իրականացնելու տեսանկյունից կրկին անհրաժեշտություն կա՝ անձեռնմխելիությունը հաղթահարելու, ապա հետագայում այդ լուծումը պետք է օրենսդիրը տա» ,- նշեց Ալեքսանյանը։

Փաստաբանի դիտարկմամբ՝ դատախազությունը չի կարող այս պահին դիմել ԱԺ և ստանալ համապատասխան թույլտվություն, դատարանը՝ նույնպես, որովհետև դատարանն անկախ արբիտր է, իսկ նման գործողություն կատարելու դեպքում դատարանը կստանձնի քրեական հետապնդում իրականացնող մարմնի գործառույթը՝ դուրս գալով անկախ արբիտրի կարգավիճակից։

Ինչ վերաբերում է ՍԴ՝ դատարանի կողմից հնարավոր չդիմելուն, Ալեքսանյանը նշեց, որ դա կնշանակի, որ դատարանն այլևս չի տեսնում խնդիրը, որն տեսել և բարձրաձայնել է նախկինում, այդտեղ է լինելու արդեն խնդիրը՝ դատարանի օբյեկտիվության և անաչառության վերաբերյալ։

Հարցին՝ կաշկանդվածություն կունենա՞ դատարանը, Ալեքսանյանը պատասխանեց՝ նշելով, որ կարող է այդ ժամանակ ունենալ ողջամիտ ենթադրությունը, որ կա որոշակի կաշկանդվածություն և դրսից ներս համապատասխան ճնշումներ։

Աղբյուր` Փաստինֆո