Փաստ ինֆո

Գորիսի քաղաքապետի տեղակալ Մենուա Հովսեփյանը ձերբակալվել է Գորիսի քաղաքապետ Առուշ Առուշանյանի գործից անջատված մասի շրջանակներում՝ Քարահունջի համայնքապետ Լուսինե Ավետյանի ցուցմունքի հիման վրա։ Այս մասին «Փաստինֆո»-ի հետ զրույցում ասաց պաշտպան Արմեն Մելքոնյանը։

Ինչպես արդեն տեղեկացրել ենք՝ օգոստոսի 16-ին ՀՀ ՔԿ-ն որոշումներ է կայացրել Գորիս համայնքի ղեկավարի պաշտոնակատար Իրինա Յոլյանին, համայնքապետարանի երկու աշխատակիցներին ՀՀ քրեական օրենսգրքի 179-րդ հոդվածի 3-րդ մասի 1-ին կետով, իսկ համայնքի ղեկավարի տեղակալ Մենու Հովսեփյանին՝ ՀՀ քրեական օրենսգրքի 149.1-րդ հոդվածի 2-րդ մասի 1-ին և 2-րդ կետերով, 179-րդ հոդվածի 3-րդ մասի 1-ին և 179-րդ հոդվածի 2-րդ մասի 1-ին կետերով նախատեսված հանցավոր արարքներ կատարելու համար որպես մեղադրյալներ ներգրավելու մասին: Նրանք ձերբակալվել են՝ նրանց նկատմամբ որպես խափանման միջոց կալանավորումն ընտրելու միջնորդության քննության նպատակով դատարան ներկայացվելու համար։

Փաստաբան Արմեն Մելքոնյանը «Փաստինֆո»-ի հետ զրույցում հայտնեց, որ քրեական գործը, որի շրջանակներում նրանք ձերբակալվել են, վերաբերում է Գորիսի քաղաքապետ Առուշ Առուշանյանի և Քարահունջ բնակավայրի վարչական ղեկավար Լուսինե Ավետյանի վերաբերյալ քրեական գործից անջատված մասին։ Փաստաբանի փոխանցմամբ՝ Մենուա Հովսեփյանի մեղադրանքի հիմքում ևս դրված է Լուսինե Ավետյանի ցուցմունքը։ Խոսքը գնում է 3 մլն 53 հազար ՀՀ դրամի չափով ենթադրյալ վատնման մասին, ըստ ՔԿ-ի, սոցիալապես անապահով մարդկանց, որոնց օգնություն է բաժանվել, այդքան էլ սոցիալապես անապահով չեն եղել։

Փաստաբանը հայտնեց, որ նրանք իրենց առաջադրված մեղադրանքները չեն ընդունում։

«Սյունիքը գլխատում են, Գորիսի քաղաքապետն ապօրինի կալանավորված է, հիմա ձերբակալվել են երկու փոխքաղաքապետերը և քաղաքապետարանի երկու աշխատակից կանայք։ Մեղադրանք են առաջադրել, ըստ իս՝ ապօրինի և մինչև երեկո կալանավորման միջնորդություն կներկայացվի։ Ընդ որում՝ մեղադրանք է առաջադրվել երեք կանանց, այդ թվում՝ անչափահաս երեխա ունեցող և Մենուա Հովսեփյանին, որը չորս անչափահաս երեխա ունի»,- նշեց փաստաբանը։

Ինչ վերաբերում է հանգամանքին, որ փոխքաղաքապետերը և համայնքապետարանի երկու աշխատակիցները ձերբակալվել են՝ նրանց կալանավորելու վերաբերյալ միջնորդության քննությանը դատարան ներկայացնելու նպատակով, այսինքն՝ ՀՀ քրեական դատավարության օրենսգրքում արդեն ուժի մեջ մտած փոփոխություններով, փաստաբան Արմեն Մելքոնյանը նշեց, որ Քրեական դատավարության օրենսգրքի այս նոր փոփոխություններն իմպերատիվ բնույթ չեն կրում, այսինքն՝ քննիչն ինքն է որոշում։

«Քննիչը կարող էր ծանուցել, մարդիկ հանգիստ գային և գնային դատարան, բայց քննիչը որոշում է, որ ոչ, անպայման Իրինա Յոլյանին, որն ամբողջ պատերազմի և հետպատերազմյան շրջանում այդ տիտանիկ աշխատանքը վերցրեց իր վրա, հարյուր տղամարդու գործ արեց՝ ձեռնաշղթաներով ձերբակալված բերեին Երևան։ Սա է գնահատականը՝ այդ կատարված աշխատանքի»,- նշեց Մելքոնյանը՝ ընդգծելով, որ օրենքը թույլ է տալիս, կարող էին շատ հանգիստ չորս անձանց էլ ծանուցեին և բոլորը կգտնվեին դատարանի դիմաց, եթե որևէ մեկը չէր գա, կարող էին նման որոշում կայացնել։

«Օրենքն իմպերատիվ չի ասում, որ պարտադիր պետք է ձերբակալես անչափահաս երեխա ունեցող հայ կանանց՝ շղթայակապ բերես Երևան»,- նշեց փաստաբանը։

Փաստաբանի խոսքով՝ հաջորդիվ երևի կձերբակալվեն Գորիսի բոլոր հայրենասիրական երգեր երգած, հայրենասիրական բանաստեղծություններ արտասանած երեխաները։

Հեղինակ՝ Իզաբել Սահակյան

Աղբյուր` Փաստինֆո