Փաստ ինֆո

Հայ ազգը կուստուրիցայական իռացիոնալիզմի մեջ է։ Յուրաքանչյուր իրեն հարգող միջին վիճակագրական հայ, թրենդից հետ չմնալու համար,
աֆղանական իրադարձությունների մասով իր գեոպոլիտիկ կարծիքն է հայտնում։ Այս մասին ֆեյսբուքյան իր էջում գրել է ԱԺ նախկին պատգամավոր Նաիրա Զոհրաբյանը։

«Ու անգամ նրանք, ովքեր քարտեզի վրա դեռ շարունակում են փնտրել Ատլանտիդան, մի մասն էլ երեկ Ատլանտիդա-Երեւան չվերթով եկել է տուն ու ահավոր գոհ է ատլանտիդյան զագարից, խորիմաստ տոնով գրում են՝ «Քաբուլը ընկավ»։ Բնականաբար, անգամ աչքաչափով տեղյակ չլինելով աֆղանական խնդրից, «Թալիբանից» ու հեռավոր պատկերացում չունենալով կատարվածի հարավկովկասյան հնարավոր ռեկաշետներից։

Իսկ տեղի ունեցածի ռիսկերը առավել քան կոնկրետ ու առարկայական են։
Այլեւս ակնհայտ է, որ իսլամիստական շարժման հաղթանակը անխուսափելիորեն խթանելու է իսլամիստական թրենդը մեր թշնամի Թուրքիայում եւ Ադրբեջանում եւս։

Էրդողանն արդեն սկսել է բանակցել թալիբների հետ թե՛ ուղղակի եւ թե՛ Պակիստանի միջոցով։ Չմոռանանք, որ թալիբները Պակիստանի «դուստր ձեռնարկությունն են» ու Հայաստանի երդվյալ թշնամին։

Այսպիսով, Թուրքիան ստանում է նոր բոնուսներ, իսկ Էրդողանի ախորժակի աշխարհագրությունը շատ լայն ու կոնկրետ է։
Բնական է, որ Ռուսաստանի սահմանային երկայնքով ապակայունացման նոր ականների տեղադրումը Հարավային Կովկասը տանելու է նոր ցնցումների ու Հայաստանը չի կարող ցնցումների այդ լավայից «թռնել»։

Մտածեք այդ մասին, որովհետեւ էն վաղը, որ գալու է եւ երեւի արդեն ուշ է լինելու՝ կարծես թե տեղ է հասնում»,-գրել է Նաիրա Զոհրաբյանը։ 

Աղբյուր` Փաստինֆո