Փաստ ինֆո

Խաղաղասիրական դրսևորումները, որոնք պարբերաբար հայկական իշխանությունները ցույց են տալիս,  առավել  ծանրացնում են մեր վիճակը և ավելի են խորացնում ճգնաժամն արտաքին ճակատում: «Փաստինֆո»-ի հետ զրույցում ասաց ԲՀԿ-ական նախկին պատգամավոր Արման Աբովյանը՝ անդրադառնալով Ադրբեջանի նախագահի վերջին հայտարարություններին:

Նշենք, որ Ալիևը ծավալուն հարցազրույց է տվել Արցախյան վերջին պատերազմի վերաբերյալ և մի շարք անհեթեթ հայտարարություններ արել:

Նա, մասնավորապես, նշել է, թե հայ ժողովուրդն արդեն համակերպվել է պատերազմում կրած պարտության հետ, ինչը, ըստ նրա, ցույց են տվել արտահերթ ընտրությունների արդյունքները.

«Սա պատմության մեջ աննախադեպ պատկեր է, երբ պարտված ղեկավարությունը կրկին ստանում է ժողովրդի ձայնը»,-ասել է Ալիևը և տարօրինակ համարել, որ ռուսական կողմը  զինում է Հայաստանին:

Աբովյանի գնահատմամբ՝ ընտրության արդյունքները լրջագույն հետևանք են ունեցել Հայաստանի միջազգային իմիջի և միջազգային գործընթացների համար.

« Մեր վաղեմի թշնամիները հղում անում են և անելու են այդ ընտրությունների վրա: Ալիևն ուզում է դրանով ասել, թե տեսեք՝ հայերը մերվել են պարտությանը, բայց կան ուժեր, որոնք դրդում են հայերին առավել ագրեսիվ պահվածքի: Այս մեսիջը ուղղված էր նաև Ռուսաստանին: Թուրքիան, Ալիևի միջոցով, անում է ամեն ինչ,  որ որևէ պատրվակով ռուսներին դուրս թողնի  Արցախից և ողջ տարածաշրջանից: Չպետք է մոռանանք, որ Թուրքիան պատերազմի ամենաակտիվ մասնակիցներից էր, դրա հետ մեկտեղ, ինքը չհասավ իր վերջնական նպատակին, այն է՝ վերամիավորվել Ադրբեջանի հետ Նախիջևանի միջոցով  և դրա հետ մեկտեղ ի սպառ չեզոքացնել հայկական գործոնը, քանզի, քանի դեռ մենք կանք այս տարածաշրջանում, իրենց նախագծերը չեն իրականանա»,-ասաց Աբովյանը:

Զրուցակցի համոզմամբ՝ այն խաղաղասիրական դրսևորումները, որոնք պարբերաբար հայկական իշխանությունները ցույց են տալիս, դրանք առավել  ծանրացնում են Հայաստանի վիճակը և ավելի են խորացնում ճգնաժամն արտաքին ճակատում

«Որքան  էլ հայկական իշխանությունները բղավեն, որ իրենք խաղաղություն են ուզում,հակառակորդ կողմը չի դիտարկում խաղաղությունն այն կոնտեքստում, որը փաշինյանական իշխանությունն է տեսնում, իրենց ոչ թե խաղաղություն է պետք, այլ պետք է իրենց տարածաշրջանային նախագծերն իրականացնեն մեր հաշվին: Այդ հասկացողությունը, չգիտես ինչու, չկա մեր իշխանությունների մոտ, իրենք հրաժարվում են առերեսվել իրականության հետ, որ կա՛մ պայքարում ես, կա՛մ քեզ ոչնչացնում են: Այդ վարդագույն երազանքները, որոնց մեջ տապակվում է իշխանությունը, բերում է  ծանրագույն հետևանքների, որն էլ այսօր տեսնում ենք:Փաստացի հիմա պատերազմն ավարտված չէ, գրեթե ամեն օր կրակոցներ են լինում: Իշխանության որդեգրած քաղաքականությունը՝ ինչ  ուզում է լինի, միայն պատերազմ չլինի, դա առավել մոտեցնում է լայնածավալ պատերազմի հնարավորությունները»,-ասաց զրուցակիցը:

 Մեկնաբանելով Ալիևի մեկ այլ հայտարարությունն առ այն, թե Հայաստանը պետք է խաղաղության պայմանագիր ստորագրի, ճանաչի Ադրբեջանի տարածքային ամբողջականությունը և սրա վերաբերյալ արդեն իսկ բանակցային սեղանին կոնկրետ առաջարկ կա, Աբովյանն ասաց.

«Ես կոնկրետ առաջարկի մասին տեղյակ չեմ, միայն գիտեմ,  որ խաղաղության պայմանագիրը ենթադրում է Արցախից ի սպառ հրաժարում, տարածքային զիջումներ արդեն անմիջապես Հայաստանի տարածքով: Դե ֆակտո սա Հայաստանի մասնատման մեկնարկն է, դա ոչ թե խաղաղության պայմանագիր է , այլ՝ ինքնաոչնչացման փաստաթուղթ»:

Աղբյուր` Փաստինֆո