Փաստ ինֆո

Կորոնավիրուսի դեմ պատվաստումների պարտադրանքի վերաբերյալ հանցագործության մասին հաղորդում է ներկայացվել ՀՀ գլխավոր դատախազություն, ԱԱԾ, ՀՔԾ։ Այս մասին ֆեյսբուքյան ուղիղ եթերում ասել է «Առողջ Հանրություն» ՀԿ նախագահ, բժիշկ-նեյրովիրաբույժ Մարինա Խաչատրյանը՝ ընդգծելով, որ անգամ ոչ ուղղակի կերպով պատվաստանյութերի պարտադրումն արգելված է օրենքով։ 

Խաչատրյանը հիշեցրեց, որ ԿԳՄՍ փոխնախարար Ժաննա Անդրեասյանը փաստաթուղթ էր ուղարկել մարզերի գլխավոր քարտուղարներին, որպեսզի վերջիններս ստանձնեն դպրոցներում պատվաստումների գործընթացի իրականացումը, ինչը, ըստ Խաչատրյանի, պաշտոնեական դիրքի չարաշահում է։ Բացի այդ՝ հաղորդման շրջանակներում անդրադարձ է կատարվել նաև ՀՀ էկոնոմիկայի նախարար Վահան Քերոբյանին, որը հենց ուղիղ եթերում հայտարարել էր, որ, եթե մարդիկ չպատվաստվեն, կզրկվեն պարգևավճարից ։

Բժշկուհու խոսքով՝ ամենակարևոր գործող անձը ՀՀ առողջապահության նախարար Անահիտ Ավանեսյանն է, որը նախօրեին ևս հայտարարել է, որ պատրաստվում են պատվաստումը պարտադրել, ինչն արգելված է օրենքով։

«Բացի այն, որ իրենք պարտադրում են, նաև ստում են հանրությանը՝ ասելով, որ 100 տոկոսով ապահով է և արդյունավետ, մինչդեռ, Անահիտ Ավանեսյանը հայտարարել է, որ իրականացվում են կլինիկական փորձարկումներ, բոլոր պատվաստումներն անցնում են կլինիկական փորձարկումներ՝ երրորդ փուլով»,- նշեց նա՝ հավելելով, որ այս իշխանությունները չեն ասում, որ կանաչ անձնագիր ստանալու երեք տարբերակ կա, իրենք խոսում են միայն երկուսի մասին։

Նրա խոսքով՝ առաջին տարբերակը պատվաստումն է, որի պարագայում «կյանքը հեշտանում» է միայն վեց ամսով, որովհետև դեռևս հայտնի չէ, թե իմունիտետն ինչքան է պահպանվում, կան գիտական հոդվածներ այն մասին, որ իմունիտետը պահպանվում է ողջ կյանքի ընթացքում։

«Բացի այդ՝ որևէ մեկը չգիտի, թե այս պատվաստանյութերը որքանով են արդյունավետ նոր շտամերի հանդեպ։ Բոլոր այն մարդիկ, որոնք ստանում են այդ պատվաստանյութերը, չեն կարող վստահ լինել, որ վաղն իրենց չեն ստիպելու ստանալ նոր պատվաստանյութեր »,- նշեց Խաչատրյանը։

Ինչ վերաբերում է երկրորդ տարբերակին, ապա այն 15 օրը մեկ ՊՇՌ թեստ հանձնելն է, ինչը, Խաչատրյանի դիտարկմամբ, բավականին մեծ ֆինանսական բեռ է և աղքատ կամ անապահով խավը չի կարող իրեն թույլ տալ նման շռայլություն, որովհետև թեստերը ՀՀ-ն ստացել է՝ դրանց համար վճարելով 2600 դրամ կամ 4.5 ԱՄՆ դոլար, բայց թեստավորումն իրականացվում է միջինում 15.000 դրամով և դիտավորյալ այդ գները չեն նվազեցվում, որ մարդիկ չկարողանան վճարել և գնան պատվաստման։

Երրորդը տարբերակը վերաբերում է հակամարմինների առկայությանը։

Մանրամասները՝ տեսանյութում։

Աղբյուր` Փաստինֆո