Փաստ ինֆո

Եթե Արցախում չկա հայկական զորք, դա նշանակում է, որ այնտեղ հայ չկա և Արցախն այլևս հայկական չէ, իսկ Ադրբեջանը հասել է իր նպատակին: «Փաստինֆո»-ի հետ զրույցում ասաց քաղաքագետ Թևան Պողոսյանը:

Հիշեցնենք, որ Ադրբեջանը պահանջել է դադարեցնել հայկական զինված ուժերի տեղակայումն Արցախում:

Փորձագետի դիտարկմամբ՝ Ադրբեջանն ամեն ինչ անելու է, որպեսզի հայերն այս տարածաշրջանը լքեն.

« Ադրբեջանը մեզ ընդունում է որպես թշնամի և նպատակ է դրել մեզ վերացնել, պետք չէ այլևս զարմանալ Ադրբեջանի պահվածքի վրա, պատերազմը դեռ չի ավարտվել: Թշնամին մեզ ճնշելու է, մենք էլ պետք է փորձենք նրա դեմն առնել: Լավ ենք անում, որտեղ ուզում ենք, այնտեղ էլ հայ զինվորին կանգնեցնելու ենք, մեր հողը պաշտպանելու ենք, պետք է նաև ամեն ինչ անենք, որ կորցրած տարածքները վերականգնենք, սա է հայ ազգի նպատակը»,-ասաց զրուցակիցը:

Իսկ թե գործող իշխանություններն այս ուղղությամբ քայլեր ձեռնարկու՞մ է, փորձագետը պատասխանեց.

«Հայ ազգն իր երազանքները վերջին ընտրություններով չի պայմանավորում: Այդ ուժը ստացել է ձայների 1/4-ը և չի նշանակում, որ ինքն է ներկայացնում հայ ազգի իղձերը: Իրենք իրենց քաղաքական ուժին են ներկայացնում, որը պարտվողական է, պարտվել են պատերազմը, կորցրել են Արցախը, մենք պետք է խոսենք միայն մեր ազգային երազանքների մասին»,-ասաց Պողոսյանը:

Փորձագետը չբացառեց, որ գործող իշխանություններն Ադրբեջանի այս պահանջը ևս կկատարեն.
«Մինչ այսօր իշխանությունների վարած քաղաքականության արդյունքում հայությունը լքում է Արցախը: Այս իմաստով իրենց և Ադրբեջանի վարած քաղաքականությունները համընկնում են»,-ասաց փորձագետը Թևան Պողոսյանի խոսքով՝ Ադրբեջանը փորձում է տեղեկատվական հիմք ապահովել իր հանցավոր գործողությունների համար.

«Ադրբեջանը ռազմական գործողություններ է իրականացնում, ԱԹՍ-ներ է օգտագործում, կրակում է, բայց որպեսզի աշխարհը չասի՝ ի՞նչ ես անում, նա ապահովում է տեղեկատվական հիմքեր: Պատերազմն այլևս միայն կրակելը չէ, դա նաև տեղեկատվությունն է, տնտեսությունն է, պարենային անվտանգությունն է, ժողովրդագրությունն է, իսկ Ադրբեջանը սա համակարգված անում է»,-ասաց զրուցակիցը:

Քաղաքագետն արձանագրեց, որ Ադրբեջանն իր որդեգրած քաղաքականությունը տարիների ընթացքում չի փոխել, մշտապես միջազգային կարևոր հանդիպումներից առաջ դիմում է սադրանքների.

«Երբ էլ Հայաստանի ՊՆ նախարարը մեկնի Ռուսաստան, սադրանքներ լինելու են, մենք պետք է պատրաստ լինենք, որ Հայաստանի իշխանություններից ով էլ մեկնի Արցախ, սադրանքներ են լինելու, դրանից պետք է ոչ թե վախենանք, այլ պետք է պատրաստ լինենք դրանց և այնպես պատասխան տանք, որ մյուս անգամ Ադրբեջանը չդիմի նման քայլերի: Ադրբեջանն իր քաղաքականությունը 94թ-ից չի փոխել, ամեն անգամ, երբ որևէ միջազգային հանդիպում պետք է լինի, լինում են սադրանքներ, նրանք տեսել են, որ իրենց վարած սին քաղաքականությունը 26 տարվա մեջ բերել է հաջողության, հիմա էլ նույն կերպ շարունակում է»,-ասաց Թևան Պողոսյանը:

Աղբյուր` Փաստինֆո