Փաստ ինֆո

Տեղի է ունեցել տարօրինակ զտում, ազատում այն դատավորներից, որոնք կասկածելի վճիռներ են կայացրել «Մարտի 1»-ի գործերով։ Այս մասին լրագրողների հետ զրույցում ասաց ՀՀ արդարադատության նախարար Կարեն Անդրեասյանը։ 

««Մարտի 1»-ի գործերով 24 դատավորներից համակարգում են մնացել ընդամենը 12-ը։ Տեղի է ունեցել տարօրինակ զտում, ազատում այն դատավորներից, որոնք կասկածելի վճիռներ են կայացրել «Մարտի 1»-ի գործերով։ ՄԻԵԴ-ն էլ արդեն իսկ կայացրել և ապացուցել է, որ այդ վճիռներն անարդար էին։ Հետևաբար՝ դուք կարող եք տեսնել, որ ինքնաբերաբար տեղի է ունեցել զտում»,- նշեց Անդրեասյանը՝ հավելելով, որ այն դատավորները, որոնք կոռումպացված են, անգրագետ են, իր՝ 2013թ հրապարակած զեկույցից հետո էլ շարունակել է կրկնել սխալներ, կատարել հանցագործություններ, իսկ օրենսդրությունը թույլ է տալիս վերադառնալ 8 տարի և վարույթներ հարուցել վերջին ութ տարիների ընթացքում թույլ տրված սխալների և խախտումների վերաբերյալ։

Լրագրողի դիտարկմանը, որ Լիլիթ Թադևոսյանն այսօր Վճռաբեկ դատարանի նախագահ է, Անդրեասյանը նշեց, որ դատախազը կարող է նույնիսկ անարդար մեղադրանք պաշտպանել։

«Իմ թիրախը միշտ դատարանն է եղել, որովհետև առաջնային և կարևոր արդարությունը պետք է ներկայացնի դատարանը»,- նշեց Անդրեասյանը՝ հավելելով, որ Լիլիթ Թադևոսյանին գիտի որպես պարկեշտ և գրագետ իրավաբան, իսկ եթե որևէ համակարգ մի օր դուրս կբերի խախտում, որը թույլ է տվել Վճռաբեկ դատարանի նախագահը, նույն օրինականության սկզբունքներով կառաջնորդվեն նաև այդ դեպքում։

Աղբյուր` Փաստինֆո