Փաստ ինֆո

Նախօրեին Երևանում ժամը 19։30-ի սահմանում գրանցված ուժգին քամին պոկել է Ծովակալ Իսակով փողոցում գտնվող Գևորգ Կոստանյանի տնակի թիթեղյա տանիքը։

Տունը, որտեղ Գևորգն ապրում է իր կնոջ և երեք երեխաների հետ, որոնցից մեկն էլ նորածին է, այժմ մնացել է առանց տանիքի։

«Փաստինֆո»-ի հետ զրույցի ժամանակ Գևորգ Կոստանյանը պատմեց՝ նախորդ տարի էր վերանորոգել տանիքը, իսկ երեկվա քամու պատճառով այն պոկվել է։ Գևորգը նշում է, որ քամին այլ վնասներ էլ է հասցրել, պոկվել է այդ տարածքի բենզալցակայանի տանիքն ու ընկել մեքենաների վրա, ծառերն արմատախիլ են եղել։

«Երեկ 19։30-ի կողմերը շատ ուժեղ քամի էր։ Տանն էինք այդ պահին ու չնկատեցինք՝ տանիքը տարել է։ Դուրս եկա ու տեսա, որ տանիքը պոկել, քշել է 100 մ այն կողմ՝ կողքի հարևանի հողի մեջ գցել։ Դեռ այնտեղ է, չեմ կարողացել բակ բերել, որովհետև ջարդուփշուր է եղել։ Այս պահին տունն առանց տանիքի է, միայն դոմիկի փայտն է մնացել։

Աստված ենք կանչում, որ հանկարծ անձրև չգա։ Եթե հանկարծ գիշերն անձրև գա, ջուրը փայտի արանքներից տուն է լցվելու, իսկ երեխաներն ուրիշ քնելու տեղ չունեն»,-ասաց Գևորգ Կոստանյանը։

Վերջինս այսօր դիմել է ԱԺ «Քաղաքացիական պայմանագիր» խմբակցության պատգամավոր Գևորգ Պապոյանին, ով խոստացել է անպայման այդ հարցով խոսել Կենտրոն վարչական շրջանի ղեկավարի հետ, սակայն այս պահի դրությամբ դեռ որևէ նորություն չկա։

«Առավոտյան կինս էլ գնացել էր թաղապետի մոտ, բայց ասել էին, որ պետք է հերթագրվի և հինգշաբթի գնա։ Ինչպե՞ս կարող ենք դեռ մինչև հինգշաբթի էլ սպասել, եթե տանիք չունենք»,-նշեց Գևորգ Կոստանյանը։

Հարցին՝ կարո՞ղ են արդյոք մի քանի օր այլ վայրում բնակվել, քաղաքացին նշեց, որ կարող են բարեկամների տանը մնալ, բայց ամեն դեպքում, եթե անձրև գա, տան ապրանքը կփչանա.

«Մեր տանը ձեռքի հետ ամեն ինչ առել եմ, ստեղծել եմ։ Հիմա, եթե անձրև գա, տան մեջի իրերը հեչ են լինելու։ Անցած տարի, երբ տանիքը վերանորոգում էի, հենց այդ օրն առանց իմանալու քանդեցի ու անձրև եկավ։ Այդ ժամանակ էլ մի կերպ տոպրակներով փակեցինք, դույլեր դրեցինք, որ ջուրը տուն չլցվի»։

Թե ֆինանսական ինչ միջոցների մասին է խոսք գնում տանիքը վերականգնելու համար, Գևորգ Կոստանյանը տեղյակ չէ։ Մտաբերեց, որ նախորդ տարի միայն թիթեղը 200 հազար դրամով է ձեռք բերել, բայց այս դեպքում խնդիրն այլ է, քամին ամբողջ տանիքն է պոկել։

Աղբյուր` Փաստինֆո