Փաստ ինֆո

Խորհրդարանում լրագրողների աշխատանքի սահմանափակումների վերաբերյալ լրագրողական կազմակերպություններն ԱԺ ղեկավարության հետ հանդիպման ու այդ հարցը քննարկելու առաջարկ չեն ներկայացրել։

«Փաստինֆո»-ի հետ զրույցի ժամանակ Երևանի մամուլի ակումբի ղեկավար Բորիս Նավասարդյանի փոխանցմամբ՝ ԱԺ նախագահի կողմից առաջարկ է եղել ԱԺ-ում հավատարմագրված լրագրողների հետ հանդիպելու։

«Կարծում ենք, որ առաջին հերթին պետք է շահագրգիռ կողմի հետ հանդիպեն, որոնք խորհրդարանում հավատարմագրված լրագրողներն են։ Եթե մեր փորձագիտական կարծիքը պետք լինի ԱԺ ղեկավարությանը կամ հավատարմագրված լրագրողներին, պատրաստ ենք այն տրամադրել»,-նշեց Բորիս Նավասարդյանը։

Վերջինս նշեց, որ իրենց համար կարևոր է իմանալ, թե ԱԺ-ում հավատարմագրված լրագրողներն ինչպիսի պատկերացումներ ունեն կանոնակարգի, խորհրդարանում լրագրողների աշխատանքի մասին, քանի որ պրակտիկ փորձ ունեն և ավելի լավ են պատկերացնում՝ ինչպես պետք է ամեն ինչ կազմակերպել, որ հանրությունն իրազեկված լինի այդ կառույցի աշխատանքի մասին։

Անդրադառնալով ԱԺ նախագահ Ալեն Սիմոնյանի այն պնդումներին, որ սրանք ոչ թե սահմանափակումներ են, այլ բարելավումներ, Բորիս Նավասարդյանն ասաց.

«Ես հակառակի մեջ եմ համոզված, որ դրանք չեն համակարգում լրագրողների աշխատանքը, որովհետև հստակ կանոններ չկան և լրագրողներն ամեն օր նոր բաներ են իմանում, թե ինչպես պետք է աշխատեն խորհրդարանում։ Այսինքն` կանոնակարգման մասին խոսք նույնիսկ չի կարող լինել։ Դրանք այն սահմանափակումներն են, որոնք ինչքան հասկանում եմ՝ իրավիճակային են, այլ ոչ թե մտածված և համակարգված»,-նշեց Բորիս Նավասարդյանը։

Ինչ վերաբերում է նախօրեի դեպքին, երբ ԱԺ նախագահը հրամայեց անջատել ուղիղ հեռարձակումը, երբ ԱԺ-ում իրավիճակը լարվեց, Բորիս Նավասարդյանը չբացառեց, որ նման դեպքեր հնարավոր է էլի լինեն։

«Չեմ բացառում նաև անսպասելի նոր կանոններ, որոնք ոչ մեկի հետ ո՛չ քննարկվել են, ո՛չ էլ նույնիսկ պաշտոնական որոշման կարգավիճակ ստացել։ Չէի ասի, որ դա հնարավորություն չի տալիս լրագրողներին աշխատել, քանի որ ամեն դեպքում այն տեղեկությունները, որ պետք է լինեն խորհրդարանի աշխատանքի մասին, ստանում ենք, սակայն դրա համար անհրաժեշտ պայմաններ ստեղծված չեն, և փաստորեն լրագրողներն իրենց աշխատանքը ստիպված են զարտուղի ճանապարհներով կատարել»,-նշեց Բորիս Նավասարդյանը։

Անդրադառնալով միջազգային փորձին, որն իշխանական պատգամավորները պարբերաբար մեջբերում են, երբ խոսում են լրագրողների աշխատանքի սահմանափակումներից, Բորիս Նավասարդյանը նկատեց՝ միջազգային փորձը բազմազան է և հարմարեցված կոնկրետ իրավիճակներին ու ավանդույթներին։ Նրա խոսքով մեզ մոտ նույնպես ձևավորվել են ավանդույթներ և չպետք է դրանցից միանգամից հրաժարվենք և վերցնենք որևէ նախադեպ, որը հիմնված է լրիվ այլ ավանդույթների վրա։

«Պետք է հասկանալ՝ ինչ խնդիր են փորձում լուծել և այդ խնդրի լուծման ճանապարհները նաև փնտրել միջազգային տարբեր երկրների փորձում։ Բայց ոչ հապշտապ, առանց մտածելու, առանց հասկանալու՝ խնդիրը որն է, առանց հաշվի առնելու հանրության իրազեկված լինելու շահը»,-նշեց Բորիս Նավասարդյանը։

Հարցին՝ արդյոք իր կարծիքով նախորդ գումարման խորհրդարանում լրագրողները որևէ էթիկական սխալ թույլ տվե՞լ են, որ ԱԺ ղեկավարությունը նման սահմանափակումների է գնացել, Բորիս Նավասարդյանը նշեց, որ եղել են նախադեպեր, երբ լրագրողների պահվածքն է հարցեր առաջացրել։

«Այսինքն՝ որևէ կարևոր տեղեկություն ստանալու նպատակ չեն հետապնդել, այլ ուղղակի անիմաստ սադրանք են իրենցից ներկայացրել, բայց դրա լուծումը ոչ թե սահմանափակումների մեջ է, այլ որոշ էթիկայի կանոնների պահպանման մեջ հենց պատգամավորների կողմից։ Իրենց հաղորդակցության հմտությունների վրա աշխատելն է, որ կարողանան ցանկացած լրագրողի հետ շփվել և իրենց ճիշտ պահել, ինչպես նաև հստակ կանոնակարգման մեջ է, բայց այդ կանոնակարգումն առաջին հերթին որպես հիմնական նպատակ պետք է հետապնդի հանրության իրազեկվածության ապահովումը»,-հավելեց Բորիս Նավասարդյանը։

Աղբյուր` Փաստինֆո