Փաստ ինֆո

Խորհրդարանում ընդմիջումից հետո լարված իրավիճակը շարունակվում է: Ընդդիմադիր խմբակցությունները նիստերի դահլիճ մտան նիստերի մեկնարկից որոշ ժամանակ անց:

«Քաղաքացիական պայմանագիր» խմբակցության ղեկավար Հայկ Կոնջորյանն էլ ամբիոնի մոտ սպասեց, մինչև ընդդիմադիր պատգամավորները գան, որպեսզի սկսի իր ելույթը:

«Երբ ընդդիմադիդիր պատգամավորները համարձակ ելույթներ են ունենում , փորձում են տղամարդկության վարժանքներ անել այստեղից, պետք է տղամարդկություն ունեն, հետ վերադառնան դահլիճ և լսեն իրենց մասին ասվածը»,-ասաց Կոնջորյանը:

Իսկ երբ «Հայաստան» խմբակցության պատգամավորները վերադարձան, Հայկ Կոնջորյանն արձագանքեց Իշխան Սաղաթելյանի ելույթին.

«Պարո՛ն Սաղաթելյան, ձեր մեկնաբանությամբ, Ալեն Սիմոնյանն իր շեֆից է հրահանգներ ստացել, իսկ ձեր ելույթը ձեր շեֆի հետ համաձայնեցվա՞ծ էր, թե՞՝ ոչ, Ռոբերտ Քոչարյանի հետ համաձայնեցվա՞ծ էր: Երբ այստեղ ասում եք՝ սրելու ենք իրավիճակը, տղամարդկության վարժանքներ եք իրականացնում ԱԺ դահլիճից, մեր բոլորի հիշողության մեջ արթնանում է սպրինտերի արագությամբ ձեր վազքը, երբ որոշել էիք փրկել հայրենիքը, սպրինտերի արագությամբ վազքի պայմաններում եք սրելո՞ւ»,-ասաց Կոնջոյանը:

«Հայաստան» խմբակցության պատգամավոր Գեղամ Մանուկյանն էլ տեղից արձագանքեց՝ «սուտ ես ասում»:
Կոնջորյանն էլ հակադարձեց.

«Սուտը դու ես ասում, Գեղամ Մանուկյան պապանձվի՛ր և լսիր»,-ասաց նա և շարունակեց ելույթը՝ դիմելով Սեյրան Օհանյանին.

«Երբ «Հայաստան» խմբակցության պատգամավորները րոպեներ շարունակ խաթարում էին ԱԺ բնականոն նիստը, ես հանգիստ սպասում էի ելույթի իմ հերթին և հույս ունեի, որ պրն Օհանյանը կհասկանա, որ պետք է սաստի իր գործընկերներին: Ես ունեմ իմ եզրահանգումները, որ դուք կա՛մ չէիք ցանկանում ԱԺ բնականոն աշխատանքները շարունակվեն, կա՛մ էլ չեք կարող, սաստել ձեր գործընկերներին, քանի որ փաստացի չեք հանդիսանում ձեր խմբակցության ղեկավար»,-ասաց ՔՊ ղեկավարը:

Նրան փորձեց արձագանքել Սեյրան Օհանյանը, սակայն Ալեն Սիմոնյանն ասաց, որ կպատասխանի, երբ իր ելույթի ժամանակը գա

«Դուք ելույթների հնարավորություն կունենք, խոսելու տեղն ամբիոնի մոտ է»:

Հայկ Կոնջորյանն էլ հորդորեց չանցնել կարմիր գծերը, այնուհետև դիմելով ընդդիմադիրներին ասաց.

«Եթե դուք լինեք կառուցողական, կստանաք կրկնակի կառուցողականություն մեր կողմից, եթե լինեք ոչ կառուցողական, կստանաք կրկնակի ոչ կառուցողականություն: Պարո՛ն Սաղաթելյան, խորհուրդ կտամ հասկանալ ձեր կարգավիճակի նշանակությունը, պետք չէ նետվել ամբիոնի մոտ և նման ձևակերպումներ անել, եթե անգամ հրահանգված է նման արտահայտություններ անել, թող ուրիշ պատգամավորներ ասել, ձեր հերթն էլ կգա, ոնց հասկանում եմ»,-ասաց Կոնջորյանը:

Աղբյուր` Փաստինֆո