Փաստ ինֆո

ԱԺ մեծամասնական ՔՊ կուսակցության պատգամավոր Վահագն Ալեքսանյանին շատերը որպես ՔՊ մամլո խոսնակ ճանաչեցին վերջինիս՝ ֆեյսբուքյան էջի հայտնի գրառմամբ, որից հետո ոչ միայն խորհրդարանական քպականները, ընդհանրապես, այս քաղաքական ուժի բոլոր անդամներն անդառնալիորեն դարձան փաշինյանական «ուսապարկեր»։

Եվ ահա, այսօր արդեն ուսապարկի դերում հայտնված այս պատգամավորը, որ ԵՊՀ արևելագիտական ֆակուլտետի շրջանավարտ է և ըստ ամենայնի, իր առաջնորդի պես «աբիժնիկ», ժամանակից և ԵՊՀ նոր ղեկավարությունից առաջ ընկած՝ «տեղեկացնում» է՝ ԵՊՀ կոնկրետ ֆակուլտետների ղեկավարների, կոնկրետ դասախոսների թիրախավորելու հրահանգ է տրված։

Եվ մինչ ԵՊՀ նորանշանակ ռեկտորի ժամանակավոր պաշտոնակատար, նախորդ գումարման ԱԺ իշխող՝ «Իմ քայլը» խմբակցության պատգամավոր, մասնագիտությամբ աստվածաբան Հովհաննես Հովհաննիսյանը պաշտոնապես ներկայացվելուց հետո հրապարակային հայտարարել է, թե՝ «Համալսարանը պետք է դառնա իրապես կրթական հաստատություն՝ զերծ քաղաքական, կուսակցական բոլոր տեսակի շահարկումներից, դրանք պետք է թողնենք անցյալում»՝շնորհակալություն հայտնելով ԵՊՀ բոլոր ռեկտորներին ի շահ Մայր բուհի իրենց արածի համար, քպական ուսապարկերն օպերատիվ գործի են անցել՝ բնականաբար, հե՛նց քաղաքական համատեքստում։

Խոշորացույցի տակ են հայտնվել հատկապես ներկա իշխանության հակահայ գործունեության բոլոր կողմերն ու ասպեկտները հանրությանը փաստարկված ներկայացնող համալսարանականները, որոնց թվում են ուսանողների կողմից սիրված և գնահատված շատ հարգելի դասախոսներ, իրենց գործի լավագույն մասնագետներ։

Անշուշտ, որ նրանք պիտի ներկա դավադիր և հակահայ իշխանությանը ընդդիմադիր կեցվածք ունենային, քանի որ Մայր բուհի հանդեպ շուրջ երեք տարի ամենօրյա ռեժիմով ծավալվող անօրեն և անբարո գործընթացի դեմ հանդես են եկել անցած ողջ ընթացքում։

Ինչ խոսք, սուտը, կեղծիքը և մանիպուլյացիան որդեգրած իշխանությունը չի դադարելու իրեն հատուկ մոտիվներով գործել։

Գործընթացն արդեն իսկ սկսված է՝ թիրախում առաջինը ԵՊՀ արևելագիտության ֆակուլտետի դեկան Ռուբեն Մելքոնյանը եղավ, թուրքագետ, ԵՊՀ արևելագիտության ֆակուլտետի դեկան, պատմական գիտությունների դոկտոր, պրոֆեսոր։ Կասկած կա՞, որ թուրք պատմաբանների հետ հայոց պատմությունը թրքահաճո խմբագրող ու սրբագրող, հայոց լեզվի դասաժամերը բուհերում կրճատող և հայ գրականության «հայ»-ը հանող թրքասեր իշխանությունը սևեռված է լինելու դեպի հայ ժողովրդի պատմության և հայ բանասիրության, իրավագիտության ֆակուլտետներ․․․

Մանավանդ, ընդդիմադիր՝ «Հայաստան» դաշինքի կազմը այս համատեքստում հայտնի համալսարանականներով հարուստ է։

Թիրախում են՝ ԵՊՀ պատմության ֆակուլտետի դեկան, պատմական գիտությունների դոկտոր պրոֆեսոր Էդիկ Մինասյանը, ԱԺ «Հայաստան» դաշինքի պատգամավոր իրավաբանական գիտությունների թեկնածու, դոցենտ Արթուր Ղազինյանը, բնականաբար՝ նաև՝ իրավագիտության ֆակուլտետի դեկան, իրավաբանական գիտությունների դոկտոր, պրոֆեսոր, ՀՀ ԳԱԱ ակադեմիկոս Գագիկ Ղազինյանը, իշխանության հակահայ քայլերը մշտապես քննադատող ՝ ԵՊՀ հայ բանասիրության ֆակուլտետի դոցենտ, գրականագետ Սերժ Սրապիոնյանը, այլ պրոֆեսիոնալ և ազգային համալսարանականներ։

Հուսանք, որ ԵՊՀ ռեկտորի նոր պաշտոնակատարը հավատարիմ կմնա օրերս տված իր խոստմանը, այն է՝ «Համալսարանը պետք է դառնա իրապես կրթական հաստատություն, զերծ՝ քաղաքական, կուսակցական բոլոր տեսակի շահարկումներից»։

Աղբյուր` Փաստինֆո