Փաստ ինֆո

Քաղաքական մեծամասնությունը չի կարող որոշել՝ ընդդիմությունն ինչպե՞ս պետք է ելույթ ունենա, իսկ ԱԺ նախագահը պետք է իր տեղում մնա և կողմնորոշվի, ինքը ՔՊ վարչության անդա՞մ է, թե՞՝ ԱԺ նախագահ, պատգամավորների հետ որևէ մեկն իրավունք չունի նման կերպ խոսել: Այս մասին լրագրողների հետ զրույցում ասաց ԱԺ փոխնախագահ Իշխան Սաղաթելյանը՝ անդրադառնալով ԱԺ-ում տեղի ունեցած այսօրվա միջադեպին:

«Մենք ընդամենը քաղաքական գնահատական ենք տալիս, իսկ քաղաքական մեծամասնությունը պետք է համակերպվի, պետք է նստի և լսի այն բոլոր գնահատականները , որոնք հնչում են ընդդիմության կողմից»,-ասաց Սաղաթելյանը:

Լրագրողի դիտարկմանը՝որ ԱԺ նախագահը ընդդիմադիրների ամեն ելույթից հետո կզրկի նրանց ձայնի իրավունքից,

Իշխան Սաղաթելյանն ասաց.

«Կփորձեն գնալ այդ ճանապարհով, մենք էլ համապատասխան ձևով կարձագանքենք: Դուք տեսաք, որ մենք արձագանքեցինք և մեր գնահատականը հնչեցրինք, մենք չենք եկել խորհրդարան, որ ջան ասենք, ջան լսենք, մենք եկել ենք իրականությունն ասել: Այս խորհրդարանը մեզ համար դիմակներ պատռելու, մեր հասարակությանը իրականությունն ասելու ամբիոն է: Եթե իրենց թվում է, որ կարող են երկրի կեսը հանձնել, պետության գոյությունը դնեն հարցական տակ և գան ԱԺ ամբիոնից հպարտ-հպարտ շարունակեն իրենց ելույթներն ու պատասխան չստանան, սխալվում են»,-ասաց Սաղաթելյանը:

Արձագանքելով ՔՊ-ական պատգամավոր Արփի Դավոյանի «սահմանադրության հեգնանքով ԱԺ-ում հայտնված քաղաքական ուժ» պիտակավորմանը՝Սաղաթելյանն արձագանքեց.

«Ոչ ոք իրենց այդ ոճով խոսելու իրավունք չի տվել: Սահմանադրության հեգնանք իրենք են, որ հայտնվել են խորհրդարանում, այդ հեգնանքի պատճառով էլ 2018թ-ին տեղի ունեցավ այդ դժբախտությունը, որը մեր երկիրն այս իրավիճակին է հասցրել»,-ասաց նա:

Իշխան Սաղաթելյանը նաև նկատեց, որ ընդդիմադիրների բարձրացրած ցանկացած հարցին ի պատասխան՝ իշխանական պատգամավորները խոսում են միայն մարտի 1-ից և հոկտեմբերի 27-ից, իսկ հարցերին հստակ պատասխաններ չեն տալիս.

«Լավ ինչքա՞ն կարելի է այդ թեմաներով հասարակությանը կերակրել, մոլորեցնել, երբ հենց այս պահին մեր երկիրն ունի շատ խնդիրներ:

Ասում ենք Արցախի հարցով հանձնաժողով ստեղծենք, իրենք էլի խոսում են մարտի 1-ից ու հոկտեմբերի 27-ից, պատգամավորներից մեկը նույնիսկ ասաց՝ 1992թ-ին ենք Արցախը հանձնել, էլ ի՞նչ ասեմ այս մարդկանց, սա լուրջ խնդիր է»,-ասաց Սաղաթելյանը:

Աղբյուր` Փաստինֆո