Փաստ ինֆո

Ադրբեջանի հերթական պրովոկացիաներն են, որոնք սպասելի են։ Պետք է շատ հանգիստ վերաբերվենք նման բաներին, որովհետև հակառակորդի քայլերը կանխատեսելի են։ «Փաստինֆո»-ի հետ զրույցի ժամանակ ասաց ԱՀ արտաքին գործերի նախարար Դավիթ Բաբայանը՝ անդրադառնալով Արցախում Մխիթարաշեն գյուղի ուղղությամբ կրակոցներին։

Դավիթ Բաբայանը նշեց, որ այժմ իրավիճակն ընդհանուր առմամբ հանգիստ է.

«Ադրբեջանը չի կարողանում լայնածավալ պատերազմ սկսել, քանի որ ռուսական խաղաղապահ ուժերն այստեղ են։ Հասկանալի է, որ դա կբերի ավելի մեծ բախումների, հետևաբար փորձում է նման պրովոկացիաների միջոցով վհատեցնել մեզ, ժողովրդի մոտ ստեղծել այնպիսի իրավիճակ, որ այստեղ անվտանգ չէ, հեռանկար չկա, որ մարդիկ թողնեն գնան»,-նշեց Դավիթ Բաբայանը՝ ընդգծելով, որ թշնամու նպատակն Արցախի հայաթափումն է, քանի որ այդկերպ իրենք ավելի քիչ ռեսուրսներ կծախսեն։

ԱԳ նախարարը կարծում է, որ Արցախում մարդիկ պետք է պատրաստ լինեն միշտ, պետք է բացառեն վհատությունը, քանի որ մնացածն արդեն տեխնիկական հարցեր են։

Հարցին՝ արդյոք կարծում է, որ այժմ ժամանակն է Արցախում սոցիալական ծրագրերից զարգացման ծրագրերին անցում կատարելու՝ հաշվի առնելով այնտեղ տիրող անորոշությունները, թշնամու սադրանքները, Դավիթ Բաբայանը նշեց, որ վաղ թե ուշ պետք է զարգացման ծրագրերի անցնեն։

«Ժողովուրդն այստեղ չպետք է ընդմիշտ նպաստներ ստանա։ Այդկերպ նաև արժեհամակարգն է խարխլվում։ Որոշ ժամանակ պետք է մինչև ոտքի կանգնեն, բայց կողմնակից եմ սոցիալական ներդրումների, ոչ թե հենց այնպես սոցիալական օգնության, որ մարդիկ նախաձեռնող, աշխատասեր լինեն, իսկ դա զարգացման կարևոր գրավականներից է»,-ասաց ԱՀ ԱԳ նախարարը։

Վերջինս ընդգծեց՝ պետք է ցույց տանք, որ ժողովուրդ ենք, այլ ոչ թե ինչ-որ մասսա, ում Ադրբեջանն ուզում է դարձնել ցեղատեսակ, որը միայն ուտելու մասին է մտածում։

«Սա է նրանց նպատակը, որ քայքայեն մեր արժեհամակարգը և ասեն՝ էս չե՞ք դուք, սրանք էլ ուզում են պետություն ստեղծել։ Նրանց պլանները պետք է ձախողվեն, և այդ հնարավորությունները կան։ Մեզանից է կախված՝ ինչպես դրանք կօգտագործենք»,-նշեց Դավիթ Բաբայանը։

Ավելի վաղ հայտնել էինք, որ օգոստոսի 9-ին՝ ժամը 16։00-ից 22։00-ն ընկած ժամանակահատվածում, հակառակորդը խախտել է հրադադարի պահպանման ռեժիմը և կրակ բացել Մխիթարաշեն գյուղի ուղղությամբ։ Նշենք, որ գնդակոծության հետևանքով քաղաքացիական ավտոմեքենա է վնասվել։

Աղբյուր` Փաստինֆո