Փաստ ինֆո

Օձունի համայնքապետ Արսեն Տիտանյանին Լոռու մարզպետարանում ծեծի ենթարկելու դեպքից անցել է շուրջ երկու ամիս, սակայն հարուցված քրեական գործով որևէ տեղաշարժ չկա։ ՀՔԾ-ից «Փաստինֆո»-ի հարցին ի պատասխան հայտնեցին, որ քրեական գործով նախաքննությունը շարունակվում է, մեղադրյալի կարգավիճակ ունեցող անձ չկա։

Հիշեցնենք, որ «Հայաստան» դաշինքի շտաբի ղեկավար Արմեն Գևորգյանը հունիսի 22-ին հայտնել է, որ Լոռու մարզի Օձուն համայնքի ղեկավար Արսեն Տիտանյանին կանչել է մարզպետը և ներկայացրել հրաժարականի դիմում գրելու անօրինական պահանջ: Ըստ Արմեն Գևորգյանի` Օձուն համայնքի ղեկավարը հրաժարվել է կատարել Լոռու մարզպետի պահանջը, որից հետո պահանջը չկատարելու համար մարզպետարանի շենքում, 7-8 մարդու ներկայությամբ, նրան ծեծի են ենթարկել:

Տիտանյանը հանցագործության մասին հաղորդում է ներկայացրել ՀՀ ոստիկանություն։ Լոռու մարզպետարանում Օձունի համայնքապետ Արսեն Տիտանյանին ծեծի ենթարկելու դեպքի առթիվ ՀՀ Լոռու մարզի դատախազությունում հարուցվել է քրեական գործ՝ ՀՀ քրեական օրենսգրքի 309-րդ հոդվածի 2-րդ մասի հատկանիշներով՝ պաշտոնեական լիազորություններն անցնելը, որը զուգորդվել է բռնությամբ, զենք կամ հատուկ միջոցներ գործադրելով, նշանակվել է դատաբժշկական փորձաքննություն։ Հարուցված քրեական գործի շրջանակներում Արսեն Տիտանյանը ճանաչվել է որպես տուժող։

«Փաստինֆո»-ն արդեն տեղեկացրել է, որ ՀՔԾ-ն տապալել է նաեւ Գորիսի համայնքապետի տեղակալ Մենուա Հովսեփյանի նկատմամբ կիրառված բռնության դեպքի առթիվ քրեական գործնի քննությունը։ Ճիշտ է, Մ. Հովսեփյանը ճանաչվել է տուժող, նրա մասնակցությամբ կատարվել դեպքի վայրի զննություն հենց ոստիկանության բաժնում, որի ժամանակ հաստատվել է, որ նրան ծեծել են ոստիկանապետի տեղակալի աշխատասենյակում, սակայն կրկին որեւէ մեկի ՀՔԾ-ն մեղադրանք չի առաջադրել, թեեւ արդեն անցել է մի քանի ամիս։

Աղբյուր` Փաստինֆո