Փաստ ինֆո

Չեմ զարմանա, եթե իշխանությունները մի գեղեցիկ օր ասեն, որ Տիգրան Մեծն էր մեղավոր, որովհետև սխալ կնոջ հետ ամուսնացավ և Էրատո անունով ծոռնուհին շատ անհաջող տիպ ստացվեց, ինչից սկսվեցին մեր բոլոր ձախողումները։ Լրագրողների հետ զրույցի ժամանակ ասաց ԱԺ «Հայաստան» խմբակցության պատգամավոր Արթուր Խաչատրյանը։

«Արցախի 75 տոկոսը մենք կորցրեցինք 2020թ.-ի նոյեմբերի 9-ի խայտառակ փաստաթղթի արդյունքում, իսկ իրականում Արցախի մեր կորուստները սկսեցին, երբ 2018թ.-ի երկրորդ կեսից իշխանությունները սկսեցին վարել անհեռատես քաղաքականություն։ Գլխավոր շտաբի հորդորներին չհետևելը, դիվանագիտական ձախողումներն ազատեցին Ադրբեջանի ձեռքերը, որ նրանք ագրեսիա ծավալեն Հայաստանի և Արցախի դեմ։ Ինչ վերաբերում է այն պնդումներին, որ Արցախը 30 տարի առաջ էին տվել, այսինքն ի՞նչ են ուզում ասել, 30 տարի առաջ տվեցին՝ իմանալով, որ 2018-ին Նիկոլ Փաշինյանն է գալու և նրա վրա կարող են այդ պարտությունը դուրս գրել, դա աբսուրդի ժանրից է»,-ասաց պատգամավորը։

Անդրադառնալով «ՔՊ» խմբակցության պատգամավոր Նազելի Բաղդասարյանի ելույթի այն հատվածին, որը վերաբերում էր Արթուր Մկրտչյանի մահվանը, Արթուր Խաչատրյանն ասաց.

«Արթուր Մկրտչյանը զոհվել է դժբախտ պատահարի արդյունքում։ Որևէ այլ ապացույց, փաստ չկա։ Պետք չէ փորձել դա շահարկել։ Արթուր Մկրտչյանը զոհվեց ապրիլի 14-ին, մայիսի 8-ին ազատագրվեց Շուշին, ազատագրվեցին մեր մյուս պատմական տարածքները։ Ինչպե՞ս կարող էինք Արցախը տալ՝ դեռևս Արցախը չազատագրելով»,-նշեց Արթուր Խաչատրյանը։

Պատգամավորը նկատեց՝ իշխանությունները փորձում են խորտակել կորցրածը հետ բերելու բոլոր հույսերը։

Հարցին՝ եթե իրենք իշխանության գային, ինչպե՞ս էին հետ բերելու Շուշին և Հադրութը, Արթուր Խաչատրյանը նկատեց՝ Շուշիի, Հադրութի և ընդհանրապես Արցախի կարգավիճակը դեռևս հստակեցված չէ, այսինքն պետք է հմուտ բանակցել, դաշնակիցներ ձեռք բերել ու հարցը վերադարձնել բանակցությունների սեղան։

Արթուր Խաչատրյանը նշեց, որ Արցախի կարգավիճակի շուրջ բանակցություններ դեռևս չեն ծավալվում. «Լավ բանակցությունների և բանակի վերակազմավորման արդյունքում հնարավոր կլինի, այլ ոչ թե բանակի կազմաքանդման»,-նշեց պատգամավորը։

Աղբյուր` Փաստինֆո