Փաստ ինֆո

Հերթական քաղաքական անբարոյականությունն է, ուրիշ ոչինչ։ Հերթական ձևերը, հերթական շոուներն են։ «Փաստինֆո»-ի հետ զրույցում ասել է Գյումրիի նախկին քաղաքապետ, ԱԺ նախկին պատգամավոր Վարդան Ղուկասյանը՝ անդրադառնալով իր նկատմամբ իրականացվող քրեական հետապնդմանը։

«Այս տեսակը չեն սիրում։ Չեն սիրում, որ մարդը հայրենասեր լինի, իր հայրենիքը սիրի, այդ տեսակը սորոսականներին դուր չի գալիս, այս տեսակը պետք է երկրի երեսից գնա, որ իրենք ինչ ուզեն՝ անեն»,- ընդգծել է Ղուկասյանը՝ հավելելով, որ խոսքը գնում է 10 տարվա վաղեմության գործի մասին։

«ՀՀ-ում չկա մի կառույց, որն իրենց ասածները ստուգած չլինի՝ մի քանի անգամ։ Այդքանից հետո, եթե քաղաքապետը, որն ունի իր ձեռքի տակ 1000-1500 հաստիք և բոլոր աշխատակիցների տեղը պատասխանատու է, ուրեմն ինչ ասեմ։ Ավելի լավ է գրեն՝ առանց հանցանքի քրեական գործ հարուցել»,- նշեց Ղուկասյանը՝ հավելելով, որ այն, ինչ ներկայացրել է նախաքննական մարմինը, հիմարություն է, նման բան գոյություն չունի։

Նրա խոսքով՝ քաղաքում երկրաշարժից հետո կա 40.000-ից ավելի ապօրինի շինություն ու կարևորը քաղաքի կառուցապատումն է եղել, ինչն իրականացվել է և հենց դրա շնորհիվ է, որ այժմ զբոսաշրջիկներ են այցելում։ Նրա համոզմամբ՝ ամեն ինչ իրականացվել է օրենքի սահմաններում։

«Ինչ-որ խոսում են՝ հիմարություն է, հերթական հիմարությունն է, հերթական մարդկանց վատաբանելն է, նույն ձեռագիրը։ Երկրում ոչինչ չի փոխվել, ափսոս, որ սրան օգնեցինք»,- նշեց Ղուկասյանը։

Հարցին՝ արդյոք նախորդ իշխանությունների ժամանակ ևս նման խնդիր է եղել, Ղուկասյանը պատասխանեց՝ նշելով, որ նախկին իշխանությունների ժամանակ ՀԿԳ-ում մեկ տարի ստուգել են և վերջում գրություն է ստացվել, որ ամբողջն օրենքին համապատասխանում է։
«Դեռ մարդուն էլ մեկ տարի տարել պահել են, չեն կարողանում մինչև հիմա ապացուցել, թե ինչու են տարել պահել, եթե բողոքի՝ բոլորին կդատեն։ Հայաստանում կառույց չկա, որ ստուգած չլինի»,- նշեց Ղուկասյանը։

Ինչ վերաբերում է քննչական գործողություններին, ապա Ղուկասյանը հայտնեց, որ ցուցմունք չի տվել, այսօր իրեն ուղղակի հրավիրել են, ինքն էլ ասել է, որ մեղադրանքը չի ընդունում։

«Այս վերջերս Քոչարյան Ռոբերտին պաշտպանեցինք, էս ամենը սարքեցին»,- նշեց նա՝ հավելելով, որ իր նկատմամբ նման գործողություններ են իրականացվում նաև Ռոբերտ Քոչարյանին պաշտպանելու համար։

Ղուկասյանի փոխանցմամբ՝ իր դեմ ցուցմունք տված անձինք չկան. «Եթե բաժինը, ինչ-որ մասնագետ սխալ է արել, քաղաքապետի վրա են գործ հարուցում։ Պատկերացրեք՝ ես ոչ մի տեղ ոչ ստորագրել եմ, ոչ էլ։ Կանցնենք, սա էլ կանցնենք։ Հերթական շոուներն են, բայց այսքան չարություն, նենգություն որտե՞ղից այս մարդկանց մեջ, ինչ-որ մեկին վատություն չենք արել։ Ինչու են այդքան թշնամի»։

Ինչպես արդեն տեղեկացրել ենք՝ ՀՀ քննչական կոմիտեն այսօր հայտարարել է, որ Վարդան Ղուկասյանին մեղադրանք է առաջադրվել ՀՀ քրեական օրենսգրքի 308-րդ հոդվածի 2-րդ մասով (9 դրվագ), 308-րդ հոդվածի 1-ին մասով (10 դրվագ) և 314-րդ հոդվածի 1-ին մասով՝ (19 դրվագ)։ Նրա նկատմամբ որպես խափանման միջոց է կիրառվել ստորագրությունը՝ չհեռանալու մասին։

Ըստ քրեական գործի՝ Ղուկասյանը 2001-2011 թվականների ընթացքում ուղղակի վաճառքով կամ աճուրդով օտարել է ՀՀ հողային օրենսգրքի 60-րդ հոդվածով սահմանված՝ քաղաքացիներին և իրավաբանական անձանց սեփականության իրավունքով փոխանցելն արգելված պետական կամ համայնքային սեփականություն հանդիսացող բազմաթիվ հողատարածքներ:

Աղբյուր` Փաստինֆո