Փաստ ինֆո

Ինձ խորհրդարան բերեց պատերազմն ու դրա հետևանքները։ Լրագրողների հետ զրույցի ժամանակ այս մասին ասաց ԱԺ «Հայաստան» խմբակցության պատգամավոր Դավիթ Սեդրակյանը։

Հարցին, թե ի՞նչ գործունեություն է պատրաստվում ծավալել խորհրդարանում և ո՞ր հանձնաժողովի աշխատանքներին է ցանկանում ներգրավված լինել, պատգամավորն ասաց, որ նախընտրում է ԱԺ տարածքային կառավարման հանձնաժողովում լինել։

Դիտարկմանը, որ Իշխան Սաղաթելյանն առաջին փորձից ԱԺ փոխնախագահ չընտրվեց իր բացակայության պատճառով, Դավիթ Սեդրակյանն ասաց. «Կարծում եմ՝ պարտադիր չէ, որ բոլորն ինչ-որ հարցերում ԱԺ դահլիճում ակտիվ լինեն հարցերով և ելույթներով։ Եթե ես ակտիվ խորհրդարանական չլինեի, այս հարցազրույցն էլ չէր լինի։ Մենք ամեն ինչ քննարկում ենք խմբակցության ներսում, տեղյակ եմ պահել խմբակցության ղեկավարին երկրից դուրս գալու մասին։ Իշխան Սաղաթելյանն առաջին անգամ չընտրվեց մեկ անվավեր ձայնի պատճառով։ Իշխանական խմբակցությունն արդեն նկատել էր, որ ես չկամ։ Նրանք իմ տեղն էլ մասնակցեցին, սակայն եղավ մեկ անվավեր քվե։ Ես դա որակել եմ որպես կես ժամանոց փոքրիկ մանիպուլյացիա։ Ինչ վերաբերում է ակտիվությանը, մենք մեր ստրատեգիան ունենք և գիտենք՝ ով որտեղ և ինչ գործողություններում պետք է ակտիվ լինի»,-ասաց պատգամավորը։

Անդրադառնալով դիտարկմանը, որ իշխանությունները թիրախավորում են նախկիններին, իսկ իր հայրը ժամանակին իշխանության մաս է կազմել և աղմկահարույց անձ եղել, Դավիթ Սեդրակյանը նկատեց՝ շատ գործերով մեղադրանքներ են առաջադրվել, որոնցից մի մասը դատարանում է։

«Կարծում եմ՝ առաջիկա տարիների ընթացքում պատասխանները դատարանից կամ քննչական մարմիններից կստանաք։ Ուզում եմ անպայման անդրադառնալ լրագրողների հետ կապված միջադեպերին, Երևանի կեսին, եթե մոտենան լրագրողներն ու այդ տարիքի մարդկանց մի քիչ նյարդայնացնեն, կարող է նման միջադեպեր լինեն։ Երկու դեպք է եղել և շատ կարճ ժամանակ հետո բոլոր լրագրողների հետ հարաբերությունները հարթվել են»,-ասաց պատգամավորը։

Աղբյուր` Փաստինֆո