Փաստ ինֆո

Տևական ժամանակ է, որ Վերաքննիչ դատարանի ավտոմատ համակարգը, որը պետք է մակագրի դատավորներին, առգրավված է ԱԱԾ-ի կողմի և դատավորների մակագրումը տեղի է ունենում կասկածելի եղանակով։ ԱԺ նիստին ասաց «Պատիվ ունեմ» խմբակցության քարտուղար Հայկ Մամիջանյանը՝ դիմելով պետաիրավական հանձնաժողովի նախագահի պաշտոնում առաջադրված Վլադիմիր Վարդանյանին։

Ընդդիմադիր խմբակցության քարտուղարը հետաքրքրվեց՝ արդյո՞ք այդ իրավիճակը նորմալ է և չի հակասում շատ նորմերի. «Ի՞նչ պրոակտիվ գործողություններ եք արել, անում կամ անելու դրա հետ կապված»,-նշեց պատգամավորը։

Վլադիմիր Վարդանյանը նկատեց՝ եթե դատական համակարգի աշխատանքները որևէ պատճառով խաթարվում են, այդ թվում համակարգչի առգրավման պատճառով, դա լրջագույն խնդիրներից է։

«Ավելի անկեղծ լինենք և հասկանանք, որ այդ մակագրության ինստիտուտը մի քանի տարի է, որ գործադրվել է։ Չեմ արդարացնում, պարզապես ասում եմ, որ դա նոր ինստիտուտ է։ Քանի որ ծրագրի հետ գործ ունենք, դա ևս կարող է մանիպուլյացիայի հիմք լինել, բայց իմ մոտեցումը հետևյալն է։ Ակտիվ աշխատում ենք դատական իշխանության մեր ներկայացուցիչների հետ և առաջիկայում եթե ձեր խմբակցության ներկայացուցիչներն էլ պետաիրավական հարցերի հանձնաժողովում ցանկանան այս հարցն ավելի մանրամասն ուսումնասիրել, պատրաստ կլինեն հրավիրել և՛ ԲԴԽ-ի, և՛ Վճռաբեկ դատարանի ներկայացուցիչներին։ Մի կողմից իհարկե գործ ունենք դատարանների աշխատանքի բնականոն գործունեության ապահովման հետ, մյուս կողմից եթե քրեական գործով ինչ-որ մի բան համարվել է իրեղեն ապացույց, ապա այստեղ վիճել դժվար է։ Չենք կարող միջամտել իրավապահ մարմինների գործունեությանը»,-ասաց պատգամավորը։

Աղբյուր` Փաստինֆո