Փաստ ինֆո

Այսօր հաստատվեց, որ իշխանություններին ծառայություններ մատուցած դատավորների որդիները շարունակում են հավակնել մինչդատական վարույթի նկատմամբ դատական վերահսկողության գործերի և օպերատիվ-հետախուզական միջոցառումներ իրականացնելու վերաբերյալ միջնորդությունների քննության համար նախատեսված առաջին ատյանի դատարանում դատավորների պաշտոնին։ «Փաստինֆո»-ի հաղորդմամբ՝ քիչ առաջ ԲԴԽ-ում ամփոփվեց նոր դատարանի դատավորների 17 հաստիքների համար 50 թեկնածուների գրավոր քննության արդյունքները։ 

Ինչպես արդեն տեղեկացրել ենք՝ հավակնորդների թվում են նաեւ Վերաքննիչ քրեական դատարանի նախագահ Տիգրան Սահակյանի քննիչ որդին՝ Վազգեն Սահակյանը, Վերաքննիչ քրեական դատարանի դատավոր Մհեր Արղամանյանի փաստաբան որդին՝ Դավիթ Արղամանյանը և Երևանի ընդհանուր իրավասության դատարանի նախագահ Արթուր Մկրտչյանի դատախազ որդին՝ Միքայել Գրիշայի Գրիգորյանը։ Ի դեպ, նշված երեք դատավորներն էլ այս տարիներին բազում ծառայություններ են մատուցել Փաշինյանի իշխանությանը՝ վերջինիս ուշադրության կենտրոնում գտնվող գործերով կայացնելով իշխանահաճո որոշումներ։

Գրավոր քննության արդյունքների ամփոփման արդյունքում անցողիկ շեմը հաղթահարած մասնակիցների թվում է Վերաքննիչ քրեական դատարանի դատավոր Մհեր Արղամանյանի փաստաբան որդին՝ Դավիթ Արղամանյանը, որն ի դեպ մասնակցում էր Ռոբերտ Քոչարյանի դեմ իրականացվող բողոքի ակցիաներին։

Գրավոր քննությունը հաղթահարելու համար մասնակիցները պետք է «Քրեական իրավունք» առարկայից հավաքեին առնվազն 14 միավոր, իսկ «Քրեական դատավարությունից»՝ առնվազն 40 միավոր։

Վերաքննիչ քրեական դատարանի դատավոր Մհեր Արղամանյանի որդին՝ Դավիթ Արղամանյանը քրեական իրավունք առարկայից հավաքել է 17 միավոր, 43 միավոր՝ քրեական դատավարությունից։ Գրավոր քննությունը չեն հաղթահարել Վերաքննիչ քրեական դատարանի նախագահ Տիգրան Սահակյանի որդին՝ Վազգեն Սահակյանը, որը քրեական իրավունքից հավաքել է 15 միավոր, քրեական դատավարությունից՝ 30 միավոր և Երևանի ընդհանուր իրավասության դատարանի նախագահ Արթուր Մկրտչյանի որդին՝ Միքայել Գրիգորյանը, որը քրեական իրավունք առարկայից ստացել է 13, իսկ քրեական դատավարությունից՝ 39 միավոր։

Աղբյուր` Փաստինֆո