Փաստ ինֆո

Ըստ մամուլի հրապարակումների՝ այն ժամանակ երբ ստանձնել էիք աղետի գոտու վերականգնման պատասխանատվությունը, ձեռք բերված շինտեխնիկան այդպես էլ չի հայտնվել Գյումրիում։ ԱԺ-ում Անդրանիկ Քոչարյանին նման հարց ուղղեց «Պատիվ ունեմ» դաշինքի քարտուղար Հայկ Մամիջանյանը։

Անդրանիկ Քոչարյանը նկատեց՝ եթե նախկին իշխանությունները նման տեղեկատվություն ունենային, ապա իրեն քարը քարին չէին թողնի։
«Ինչու՞ են թողել, որ ես հանգիստ ապրեմ, մարտի 1-ի փաստահավաք խմբի 5 զեկույց ներկայացնեմ։ Հիմա հանցագործության մասին հաղորդում եք անում, իրավապահ մարմինները թող տեսնեն դրանք տելեգրամյան ալիքների սին նյութե՞ր են, թե՞ պարզապես շահարկվող թեմաներ են, որ փորձեն նսեմացնել իմ գործունեությունն աղետի գոտում։ Այնտեղ հայտնաբերել ենք բազմաթիվ թաքցրած շինտեխնիկա, որը հանել և օգտագործել ենք աղետի գոտու խնդիրների համար»,-ասաց Անդրանիկ Քոչարյանը՝ ընդգծելով, որ եթե նման բան լիներ, ապա նախկին իշխանություններն այդ հնարավորությունն իրենց ձեռքից բաց չէին թողնի։

Հայկ Մամիջանյանն էլ պնդեց՝ խոսքը ոչ թե 1 կգ խնձորի, այլ ահռելի քանակությամբ տեխնիկայի մասին է։

«Այդ շինտեխնիկան հասե՞լ է աղետի գոտի, թե՞ ոչ և ունե՞ք տեղեկություն, թե ձեր՝ այդ գործառույթն իրականացնելու ավարտին դրանք ՀՀ սահմաններու՞մ են գտնվել, թե՞ դուրս են բերվել»,-հարցրեց Հայկ Մամիջանյանը։

Անդրանիկ Քոչարյանն էլ վստահեցրեց, որ իր պաշտոնավարման ընթացքում տեխնիակական բոլոր կռանները գտնվել են Հայաստանի տարածքում։

«Թե ինչ է դուրս բերվել, իսկ ինչ՝ ոչ, բոլոր իշխանություններն իմ պաշտոնավարումից հետո ունեցել են հնարավորություն, որ եթե դրանք տարվել են, հայտնաբերեն։ Տասնյակ տարիներ իշխանությունն այդ հնարավորությունն ունեցել է և չի կարողացել որևէ կերպ արձագանքել այդ փաստերին։ Դրանք չեն եղել, սուտ են»,-ասաց Անդրանիկ Քոչարյանը։

Աղբյուր` Փաստինֆո