Փաստ ինֆո

Ադրբեջանը Թուրքիայի և Մեծ Բրիտանիայի գերիշխանության ներքո իր ռազմավարական շահերն է հետապնդում, պատրաստում ճանապարհներ, որոնք վաղեմի նպատակ են հետապնդում։ «Փաստինֆո»-ի հետ զրույցի ժամանակ այս մասին ասաց ռազմական փորձագետ Հայկ Նահապետյանը՝ անդրադառնալով Ադրբեջանի կողմից կառուցվող ճանապարհների քարտեզին։

Փորձագետի դիտարկմամբ՝ Ադրբեջանի ղեկավարը բազմիցս ասել է, որ իրենք Արևմտյան Զանգեզուր ունեն, միջանցքի խնդիր ունեն և Երևանն իրենցն է, հետևաբար այդ ճանապարհների կառուցումը սկզբունքորեն իրենց վաղեմի նպատակն է հետապնդում։

«Այդ ճանապարհները կառուցելով՝ նրանք նախ փոխում են այդ յոթ շրջանները, Արաքսի հովիտը կապելով կենտրոնին։ Այսինքն` այդտեղ վաղ թե ուշ Ադրբեջանի քաղաքացիներ են ապրելու, հետևաբար այդ ճանապարհների մի մասն առաջին հերթին ներքին սպառման համար է։ Նրանք այդկերպ առաջին հերթին ներքին խնդիր են լուծում, բայց եթե նորմալ հարևաններ լինեինք, այդ ճանապարհներն, իհարկե, մեզ համար դրական կլինեին, որովհետև այս կամ այն ձևով, կարճ ճանապարհով կապվում ենք օրինակ` Ադրբեջանի հարավի հետ։ Նորմալ հարևաններ լինելու դեպքում կարող էինք մեր հարավը տնտեսապես զարգացնել, ինչը շահավետ կլիներ նաև Ադրբեջանի համար, բայց կա իրողություն, որ Ադրբեջանը մեզ համար բարեկամ երկիր չէ։ Հետևաբար` այն, ինչ անում են, նախ իրենց ներքին սպառման համար են անում և բնականաբար փորձում են Հայաստանը ճանապարհային օղակի մեջ առնել»,-նշեց Հայկ Նահապետյանը։

Փորձագետը նկատում է՝ եթե մի երկրի ղեկավարն ասում է, որ հարևան երկրի մայրաքաղաքը վաղ թե ուշ իրենը կլինի, դա թշնամական քայլից այլ բան չի կարող որակվել։ Հայկ Նահապետյանը գտնում է, որ Հայաստանի համար կարևոր է այդ շրջափակումը ճեղքել Իրանով։ Մեր այլընտրանքն ըստ փորձագետի՝ Իրանն է։

«Կան տեղեկություններ, որ Նիկոլ Փաշինյանի և Իրանի նորընտիր նախագահի հանդիպման ժամանակ բանակցություններ են եղել Իրանի մասնակցությունը Հայաստանի զարգացման հարցով»,-նշեց փորձագետը։

Հարցին՝ արդյոք ճանապարհների կառուցման ծրագիրը Ղարաբաղի հարցը միակողմանի լուծելու նպատակ չի հետապնդում՝ հաշվի առնելով նաև այն հանգամանքը, որ Ադրբեջանը նախատեսում է կառուցումն ավարտել 2024թ.-ին, երբ լրանում է ռուս խաղաղապահների այդ տարածքներում տեղակայվելու ժամկետը, փորձագետը նկատեց՝ Արցախի հայկական մասում բնակվող մեր հայրենակիցներին ուղղված որոշակի մարտահրավեր այդտեղ կա։

Հայկ Նահապետյանը նշեց, որ չնայած ռուս խաղաղապահներն այդ տարածաշրջանում են նոյեմբերի 9-ի ստորագրված հայտարարության հիման վրա, բայց առ այսօր ռուս խաղաղապահներն Ադրբեջանի կողմից խաղաղապահի մանդատ չեն ստացել, որի մասին Նիկոլ Փաշինյանն է հրապարակավ ասել։

«Սա նշանակում է՝ այնուամենայնիվ խաղաղապահներն Ադրբեջանին ձեռք չեն տալիս, եթե որոշակի նոր իրավիճակներով ամեն ինչ անեն, որ խաղաղապահները դուրս գան կամ գոնե խաղաղապահների հետ թուրքական զորախումբ լինի, դա իր շահերից է բխում։ Ռուսաստանի շահերից բխում է, որ ռուս խաղաղապահները ոչ միայն 5 տարի մնան, այլ ավելի երկար, քանի դեռ երկու պետությունների հարաբերությունները թշնամությունից չեն վերածվել որպես հակառակորդի, հակառակորդից էլ հարևանության։ Կա վտանգ և այդ վտանգի չեզոքացման համար է Ռուսաստանի զինված ուժերի լուրջ թվակազմը, որը գնալով ավելանալու է»,-եզրափակեց Հայկ Նահապետյանը։

Աղբյուր` Փաստինֆո