Փաստ ինֆո

Ինձ համար, որպես հայ տղամարդու, անընդունելի էր այդ ամենը: Յուրաքանչյուրս պետք է ցուցաբերենք բացառիկ հարգանք կանանց նկատմամբ: ԱԺ նիստում ասաց «Հայաստան» խմբակցության պատգամավոր Արթուր Ղազինյանը՝ անդրադառնալով «Պատիվ ունեմ» խմբակցության պատգամավոր Աննա Մկրտչյանի ելույթի ժամանակ տեղի ունեցած միջադեպին:

Նշենք, որ ԱԺ ղեկավարությունը ձայնի իրավունքից զրկել էր Աննա Մկրտչյանին՝ Նիկոլ Փաշինյանին անունով դիմելու և «կապիտուլյանտ» պիտակավորում տալու համար: ԱԺ ղեկավարությունը նկատողություն հայտարարեց պատգամավորին և զրկեց նրան ձայնի իրավունքից:
Արթուր Ղազինյանն էլ նշեց, որ ԱԺ նիստը նախագահողը կարող է կարգապահական տույժ կիրառել խորհրդարանի անդամի նկատմամբ, եթե նա հնչեցնում է վիրավորական արտահայտություններ.

«Ես այդ անունը չեմ տա, որովհետև չեմ ուզում ուղղակի։ Բայց ես չէի մտածում, որ այդ անունը կարող է որպես վիրավորանք հնչել։ Մարդու անունն է այդպիսին, այդ անունով դիմում են, դա անձնագրի մեջ գրված անուն է, և չեմ կարծում, որ կիրառված տույժը իրավաչափ է և համարժեք է տեղի ունեցածին»,-ասաց Ղազինայնը:

Անդրադառնալով Արցախի հարցով մշտական հանձնաժողով ստեղծելու անհրաժեշտությանը, նա նշեց, որ « այն պետք է դառնա շտեմարան, որտեղ յուրաքանչյուրս ցանկացած ժամանակ կարող ենք դիմել՝ խորհրդատվություն ստանալու համար»: Նա ընդգծեց, որ հանձնաժողովը պետք է նախաձեռնի Արցախի հետ ռազմաքաղաքական համաձայնագրի վավերացում:

Ընդդիմադիր պատգամավորի խոսքով՝ Արցախի հարցով հանձնաժողովի ստեղծումն ուղիղ մեսիջ է միջազգային հանրութանը, որ Հայաստանը «տեր է կանգնում իր պատմական առաքելությանը և հետամուտ է իր ազգային շահերին»:

Ելույթի ավարտին Արթուր Ղազինյանն ասաց.
«Մինչ մենք այստեղ քննարկում ենք՝ պե՞տք է Արցախի հարցով հանձնաժողով, թե՝ ոչ, Երասխում երկու ժամ է թշնամին կրակում է, կրակում է խոշոր տրամաչափի զենքերով: Իսկ որն է՞ այստեղ մեր արձագանքը դրան, չկա արձագանք»,-ասաց Ղազինայնը:

Աղբյուր` Փաստինֆո