Փաստ ինֆո

Թավշյա հեղափոխությունից հետո փոփոխություններ պետք է տեսնեինք նաև Ձեր՝ խոսքը գործի վերածելու առումով. Այս մասին ԱԺ նիստում իր ելույթում ասաց «Հայաստան» խմբակցության ղեկավար Սեյրան Օհանյանը՝ դիմելով խորհրդարանական մեծամասնությանը։ 

«Ես մի բան եմ տեսնում, որ կոչվում է թերարժեքության բարդույթ։ Ես ինքս այդպիսի բարդույթ ունեմ՝ ելնելով իմ ֆիզիկական վիճակից, բայց այն տեղերում, որտեղ ես ինքնուրույն եմ և եղել եմ բարձրաստիճան անձնավորությունը, իմ մոտ այդ բարդույթը չի գործել»։

Օհանյանը նշեց, որ բարդույթներ է նկատում իշխանավորների մոտ խոսքը գործի վերածելու և սխալները ընդունելու առումով։

««Մենք ենք որ կանք, մեր ասածը պետք է անցնի, մենք ճիշտ ենք»։ Այսպես կարող են անձինք մտածել, որոնք չեն կարող լիարժեք վերլուծություն իրականացնել։ Քիչ մարդիկ են կարողանում ռեալ գնահատական տալ կատարվածին, և բացասական երևույթներին»։

Վերջինս նշեց, որ մի քանի օրերի ընթացքում՝ շփվելով իշխանական պատգամավորների հետ, չի լսել մի թերության մասին, որն արտահայտում է ստեղծված ռազաքաղաքական իրավիճակը, պարտության մեղավորների մասին ոչ մի խոսք չի եղել։

««Ես եմ որ կամը» գործով է երևում»։

Օհանյանը նշեց, որ նման թերարժեքությունը նկատել են ասֆալտին փռելու, դատական համակարգի վրա հարձակումների ընթացքում։

Կոչ արեց դուրս գալ կաղապարված իրավիճակից։ Օհանյանը նշեց՝ բարդույթի մասին է խոսում նաև այն, որ փորձում են քննադատություններից հետո մյուսներին դասեր տալ։

«Մենք չենք եկել դպրոց, եկել ենք ԱԺ-ում աշխատելու և այստեղ պետք է լինեն սուր քննադատություններ։ Մենք ռադիկալ ընդդիմություն ենք և քննադատելու ենք այն պահերը, որոնք բացասական են եղել ու ազդել մեր գործունեության վրա»։

Անդրադառնալով Արցախի հարցով ԱԺ մշտական հանձնաժողովի ստեղծմանը, Օհանյանը նշեց, որ դա անհրաժեշտություն է, որովհետև Արցախի շուրջը ձևավորված ամբողջ աշխատանքն ուղղված է եղել Արցախի ինտեգրմանը Հայաստանին՝ թե անվտանգային, թե տնտեսական, թե բանակցային ներուժի ոլորտներում։

«Բայց այդ ինտեգրումն այսօր անկում է ապրում։ Եվ այդ անկման պայմաններում ի՞նչ է մեզ մնում, որպեսզի մենք ամենօրյա աշխատանքով Արցախի հետ կապված խնդիրը մեր առջև ունենանք ու ամեն օր աշխատենք այդ ուղղությամբ։ Մանավանդ այն դեպքերում, երբ դուք մտածում եք Ադրբեջանի հետ խաղաղության մասին՝ առանց այդ խաղաղության պայմանների։ Եվ այդ խաղաղության քայլերից հետո Արցախը հայտնվելու է անկլավային և աշխարհագրական շատ բարդ վիճակում։

Այնպես որ, ես գտնում եմ, որ անհրաժեշտություն է Արցախի հարցով հանձնաժողովի ստեղծումը, և մենք աջակցելու ենք, մանավանդ այս հինգ տարվա կտրվածքով, որ ապագան դեռ հայտնի չէ՝ խաղաղապահ ուժերը կմնան Արցախում, թե՞չեն մնա, և հետո ինչպե՞ս ենք այդ անվտանգությունն ապահովելու»,- ասաց Սեյրան Օհանյանը։

Աղբյուր` Փաստինֆո