Փաստ ինֆո

ՀՀ վարչապետ Նիկոլ Փաշինյանի ասած կախարդական փայտիկը գործում է։ Կառավարությունում լրագրողների հետ զրույցի ժամանակ այս մասին ասաց ՀՀ էկոնոմիկայի նախարար Վահան Քերոբյանը։

Հարցին՝, թե ո՞րն էր այդ կախարդական փայտիկի ազդեցությունն այս 3 տարիների ընթացքում, Վահան Քերոբյանն ասաց, որ ամենակարևոր ազդեցությունը կոռուպցիայի արմատախիլ անումն էր։

«Չեմ ասում, որ կոռուպցիա չկա։ Բնականաբար կա ինչ-որ չափով, բայց այն համակարգային չէ և կոռումպացված մարդիկ բավական հաճախ ճաղերի հետևում են հայտնվում։ Դեկտեմբերին, երբ բոլոր կանխատեսումներն ասում էին, որ Հայաստանը 2021-ին կունենա 1-1.5 տոկոս տնտեսական աճ, բայց արդեն առաջին կիսամյակի արդյունքներում ունենք 5 տոկոս տնտեսական աճ և ամեն ինչ գնում է նրան, որ ունենանք 10 տոկոսից ավել տնտեսական աճ։ Այդ ամեն ինչը հետևանք է նաև նրա, որ այդ կախարդական փայտիկը գործում է։ Այսինքն տնտեսությունն արնաքամ չի լինում կոռումպացված գումարներով»,-ասաց Վահան Քերոբյանը։

Դիտարկմանը՝ նախորդ տարվանից սկսված գնաճը և՞ս այդ կախարդական փայտիկի շրջանակներում է գործում, նախարարը նկատեց՝ լավ կլիներ, որ նման հարցեր տալուց առաջ նախ վերլուծություններ ունենային այն մասին, թե մեր հարևան երկրներում ինչպիսին է գնաճը, աշխարհում հիմնական ապրանքատեսակների գնաճն ինչպիսին է։

«Հայաստանը չի կարող արտադրել ամեն ինչ, և մեծ քանակի արտադրքն ներմուծվում է։ Այդ ներմուծված ապրանքների գնի նկատմամբ առանձնապես որևէ հսկողություն չունենք։ Օգոստոս ամսից սկսվում է հիմնական ապրանքատեսակների, նոր բերքի մասին տեղեկատվության հայտնումը և վստահ եմ, որ գների էական անկում շուտով կտեսնենք»,-ասաց Վահան Քերոբյանը։

Նախարարի խոսքով այն գները, որոնք տեղական ապրանքին են վերաբերում, այդ առումով աշխատում են Կենտրոնական բանկի հետ։

Աղբյուր` Փաստինֆո