Փաստ ինֆո

Իշխանությունները և ՊՆ-ն համապատասխան միջոցներ պետք է ձեռնարկեն, որ ադրբեջանցիներին մեր տարածքներից հետ շպրտեն։ Լրագրողների հետ զրույցի ժամանակ ասաց ԱԺ «Հայաստան» խմբակցության ղեկավար Սեյրան Օհանյանը։

«Եթե ինքնուրույն չստացվի, պետք է համագործակցեն մեր ռազմավարական գործընկերոջ՝ ՀԱՊԿ-ին, իսկ ՀԱՊԿ-ի շրջանակներում հիմնական տարածաշրջանային խմբավորում տեսնում ենք մեր միացյալ զորախումբը ՌԴ-ի հետ միասին, եթե դա չստացվի, պետք է ուժ կիրառել, որովհետև դրանով խախտվում է մեր սուվերենությունը, իջնում է մեր միջազգային կշիռը որպես անկախ, սուվերեն պետություն»,-ասաց Սեյրան Օհանյանը։

Վերջինս նկատեց՝ անկլավների հարցը երբեք չի կարող լուծվել, եթե չկան համապատասխան պայմաններ սահմանները ճշտելու համար։ Սեյրան Օհանյանը կարծում է, որ Հայաստանն ինքնուրույն իր խնդիրները պետք է լուծի, ընդ որում Հայաստանն այդ հնարավորություններն ունի։

«Հայաստանը հնարավորություն ունի ժամերի ընթացքում որոշում ընդունելու, հաշվարկներ կատարելու, թե որքան են մեր սահմանները, զինված ուժերի խնդիրներն ինչպիսինն են և ԶՈւ-ն, սահմանապահ ծառայությունն ինչ կառուցվածք պետք է ունենան նաև քանակային առումով։ Անհրաժեշտության դեպքում Երևանում տեղակայված ներքին զորքերը, անվտանագային բոլոր զորքերը տանեն ու սահմանը փակեն, ոչ թե կենտրոնում պահեն՝ իրենց աթոռները պահելու համար»,-նշեց Սեյրան Օհանյանը։

Աղբյուր` Փաստինֆո