Փաստ ինֆո

ԱԺ կանոնակարգ սահմանադրական օրենքն ԱԺ պատգամավորին նկատողություն անել արտահայտություն ընդհանրապես չի պարունակում։ Լրագրողների հետ զրույցի ժամանակ այս մասին ասաց ԱԺ «Պատիվ ունեմ» խմբակցության պատգամավոր Աննա Մկրտչյանը։

«Չգիտեմ՝ նրանց ով է դա հուշել։ Կան կարգապահական միջոցներ, որոնք սպառիչ թվարկված են և դրանց կիրառման կարգն ու պայմաններն էլ են թվարկված, ինչը որևէ կերպ չի կարող ԱԺ նախագահի, փոխնախագահների ցանկությամբ կամ երեկոյան տեսած երազանքների շրջանակում լինել։ Փաստորեն Հակոբ Արշակյանի համար «Նիկոլ» բառն արտասանելը վիրավորանք է։ Ինչ վերաբերում է կապիտուլյանտին, ապա մեր երկիրը կապիտուլյացիայի ենթարկված պետություն է։ Եթե պետք է գանք ԱԺ-ում ասենք՝ ՔՊ-ն ասում է, որ ամեն ինչ պետք է լավ լինի, նման բան չի լինելու»,-ասաց պատգամավորը։

Անդրադառնալով ԱԺ նախագահության այն ակնարկին, որ պատգամավորին իրենց խմբակցությունում ևս պետք է սաստեն, Աննա Մկրտչյանը նշեց, որ իրենց խմբակցությունը և առհասարակ ընդդիմությունը միասնական է, անկեղծ և այն քվեն, որի շնորհիվ հայտնվել են ԱԺ-ում, ամբողջությամբ ռեալիզացնելու ենք։

«Չենք պատրաստվում նրանց քմահաճույքներով առաջնորդվել ու ասել՝ ոնց է ձեզ հարմար, ձեզ ոնց դիմենք։ Այս երկրում չկա «պարոն վարչապետ», չենք ասում։ Երբ կլինի «պարոն վարչապետ»-ին համապատասխան սուբյեկտ, այդ պաշտոնը կստանձնի մարդ, որն այս երկրի ինքնիշխանության համար կպայքարի, այդ ամեն ինչը կանենք»,-ասաց Աննա Մկրտչյանը։

Հիշեցնենք, որ ԱԺ նիստի ժամանակ, պատգամավոր Աննա Մկրտչյանի ելույթի ընթացքում ԱԺ փոխնախագահ Հակոբ Արշակյանը նկատողություն էր հայտարարել նրան, իսկ ԱԺ նախագահ Ալեն Սիմոնյանն անջատել էր պատգամավորի խոսափողը, քանի որ վերջինս իր ելույթում օգտագործել էր «Նիկոլ», «կապիտուլյանտ» բառերը։

Աղբյուր` Փաստինֆո