Փաստ ինֆո

«Պատիվ ունեմ» խմբակցության ղեկավար Արթուր Վանեցյանը որպես նորընտիր պատգամավոր առաջին ելույթը սկսեց կարևոր հարցերից մեկից՝ Արցախից։ Խմբակցության ղեկավարը նշեց, որ բարձրաձայնել է Արցախի հարցերով մշտական հանձնաժողով ստեղծելու մասին գաղափարը, որ հետագայում պաշտպանել է նաև «Հայաստան» խմբակցությունը։

Վանեցյանը նշեց, որ նման հանձնաժողով ստեղծելն առաջնային է։ Օրհասկան վիճակը թելադրում է ունենալ երկրորդ հայկական պետության խնդիրներով զբաղվող մշտապես գործող խորհրդարանական միավոր։

Վանեցյանը նկատեց՝ Արցախի հետ կապված հարցերը կտրուկ ավելացել են՝ ընդգրկում են անվտանգային և քաղաքական բաղադրիչները, միաժամանակ ներառում են նաև հոգևոր, մշակութային, սոցիալական, կրթական ու բազում այլ հարցեր։

«Նման հանձնաժողովի ստեղծումը նաև հստակ քաղաքական ուղերձ է իր ապագայով մտահոգ արցախահայությանը, սրտացավ աշխարհասփյուռ հայրենակիցներին, թե Ադրբեջանին ու Թուրքիային, միջազգային հանրությանը։ Ուղերձ է այն մասին, որ հայկական առաջին պետությունը Արցախի, այնտեղ ապրող ժողովրդի մասին չի մոռացել, ձեռքերը Արցախից չի լվացել, չի պատրաստվում հրաժարվել Արցախի խնդիրներով զբաղվելուց»։

Վանեցյանը նշեց, որ մշտական հանձնաժողովի կառուցվածքը արտացոլում է նաև տվյալ ժամանակաշրջանի քաղաքական նպատակահարմարությունները, առաջնահերթությունները։ Խմբակցության ղեկավարը նաև անդրադարձավ խորհրդարանում իշխաղ մեծամասնության դիտարկումներն, թե Արցախի մշտական հանձնաժողով ձևավորելու առանձին միավոր ձևավորելու կարիք չկա, որովհետև մնացած հանձնաժողովները զբաղվում են Արցախի հարցերով։ Նշեց, որ այդ փաստարկները տեղին չեն, իսկ դիտարկումներ անողներին, որոնք պնդում էին, թե ի՞նչ օրենքներ պետք է քննարկի հանձնաժողովը՝ նշեց, որ կամ լավ չեն պատկերացնում, կամ դիտավորյալ ուզում են մոլորեցնել ժողովրդին։

«Եթե առաջարկը մերժվի, կարող ենք հիմնավոր կասկածներ ունենալ, որ քաղաքական մեծամասնությունը, ՀՀ-ում այսօր իշխանություն կազմողները փորձում են կամ հետևողականորեն լվանում են իրենց ձեռքերը Արցախից, հրաժարվում Արցախից, լքում են Արցախը՝ մենք դա չենք կարող թույլ տալ։ Արցախը կա և մնում է հայկական»։

Վանեցյանը նշեց, որ հույս ունի, որ առաջարկը կընդունվի մեծամասնության կողմից։

Աղբյուր` Փաստինֆո